3 кастрычніка, Мінск /Кар. БЕЛТА/. Для сенатараў работа з людзьмі вельмі важная, заявіла ў эфіры тэлеканала "Беларусь 1" старшыня Савета Рэспублікі Наталля Качанава, паведамляе БЕЛТА.
"Гэта наш абавязак. Мы раз у месяц павінны праводзіць прыёмы па асабістых пытаннях. Гэта нават не абмяркоўваецца. Гэта ў нас прапісана ў рэгламенце. Для нас гэта вельмі важна. Таму што тыя прапановы, праблемы, якія агучваюць грамадзяне, - мы разумеем, як трэба гэта заканадаўча ўрэгуляваць і ці будзе гэта на карысць нашаму грамадству, грамадзянам, краіне, - сказала Наталля Качанава. - Вы ведаеце, для мяне наогул ніколі гэта не было цяжкім. Службовая асоба, дэпутат павінны па-добраму ставіцца да людзей, па-іншаму атрымліваецца дрэнна. І калі ў цябе гэта супадае, ты спакойна ўспрымаеш усё тое, з чым да цябе прыходзяць людзі. І, вядома, калі табе гэта не вельмі падабаецца, ты павінен гэтаму навучыцца. Ты павінен праяўляць цярпенне, павагу. Зрабіць так, каб тыя людзі, якія прыйшлі да цябе, пайшлі задаволеныя. Нават калі ты не вырашыў гэта пытанне, калі з-за заканадаўства гэта зрабіць немагчыма. Але недзе параіць трэба".
Спікер падкрэсліла: звароты грамадзян абсалютна розныя. "Людзі ідуць з прапановамі. Ёсць пытанні, якія датычацца работы мясцовых органаў улады. Гэта ЖКГ, ахова здароўя, адукацыя. І мы вельмі аператыўна ўсё гэта перадаём выканаўчай уладзе. Таму і павінен працаваць вось гэты ланцужок, які ахоплівае ўсіх службовых асоб, якія павінны працаваць з людзьмі. Што датычыцца работы мясцовых органаў улады, усё роўна ж ім даводзіцца займацца гэтымі пытаннямі, - адзначыла старшыня Савета Рэспублікі. - Асаблівую ўвагу ўдзяляем калектыўным, паўторным зваротам".
"У нас за перыяд гэтага склікання - на 40 працэнтаў больш зваротаў, чым за папярэдняе ўсё скліканне, - дадала Наталля Качанава. - Шмат людзей прыходзяць, хто вяртаецца з іншых краін, якія гавораць пра маральныя, духоўныя каштоўнасці, пра тое, што трэба сёння рабіць яшчэ для таго, каб выхоўваць у маладога пакалення культуру, нацыянальныя традыцыі падтрымліваць. Даволі шмат такіх зваротаў. Прыходзяць проста падзяліцца інфармацыяй. І мы гэта вельмі высока цэнім".-0-
