25 кастрычніка, Мінск /Кар. БЕЛТА/. Удзел у XIX Міжнароднай навуковай канферэнцыі маладых вучоных "Моладзь у навуцы" дасць даследчыкам патрэбны вопыт для іх будучай работы. Аб гэтым расказаў старшыня Савета маладых вучоных НАН Станіслаў Юрэцкі на адкрыцці мерапрыемства, перадае карэспандэнт БЕЛТА.
"У бягучым годзе на канферэнцыю зарэгістраваліся больш за 200 маладых вучоных і звыш 80 навучэнцаў. Мэта мерапрыемства - прэзентацыя навуковых распрацовак маладых вучоных, выступленне з навуковымі дакладамі, а таксама навуковыя дыскусіі. Вельмі важна, што для многіх з юнакоў і дзяўчат гэта першае выступленне і першая навуковая публікацыя, паколькі да пачатку канферэнцыі мы падрыхтавалі і апублікавалі зборнік тэзісаў і дакладаў. Усе ўдзельнікі да пачатку канферэнцыі атрымалі такія зборнікі, і гэта сур'ёзная падмога ў іх будучай навуковай дзейнасці", - сказаў Станіслаў Юрэцкі.
Старшыня Савета маладых вучоных НАН адзначыў, што на мерапрыемстве будуць прадстаўнікі розных сфер навукі - аграрнай, фізіка-тэхнічнай, біялагічнай, хімічнай, медыцынскай, IT-сферы, гісторыі, беларускай і рускай моў, а таксама гуманітарных навук і мастацтва. Такім чынам, паводле яго слоў, усе навуковыя напрамкі, якія ёсць у Беларусі, будуць шырока разгледжаны.
"Удзел у канферэнцыі для маладых вучоных - першая магчымасць прэзентаваць сваю навуковую работу, вынікі, эксперыменты і рэфераты. Так у хлопцаў і дзяўчат з'яўляецца магчымасць апрабаваць свае навуковыя рэзультаты ў Нацыянальнай акадэміі навук. Тут сур'ёзныя масцітыя вучоныя нешта ім падкажуць, недзе пакрытыкуюць, каб яны маглі выправіцца. На мой погляд, гэта дасць маладым даследчыкам патрэбны вопыт для іх будучай работы", - падкрэсліў Станіслаў Юрэцкі.
Таксама на канферэнцыі пройдзе Савет маладых вучоных Міжнароднай асацыяцыі акадэмій навук (МААН). У ім прымуць удзел госці з Расіі, Азербайджана, Кыргызстана і Арменіі. Яны абмяркуюць пытанні міжнароднага супрацоўніцтва для маладых вучоных.
У міжнароднай навуковай канферэнцыі маладых вучоных "Моладзь у навуцы - 2022" прымуць удзел маладыя вучоныя, аспіранты, саіскальнікі, магістранты, студэнты і навучэнцы Беларусі і іншых краін. На палях канферэнцыі 26 і 27 кастрычніка будуць працаваць секцыі па розных напрамках навукі на базе Цэнтральнай навуковай бібліятэкі імя Я.Коласа НАН. Мерапрыемства праводзіцца для стымулявання навукова-тэхнічнага, інавацыйнага патэнцыялу і прэзентацыі праектаў і навуковых распрацовак маладых вучоных, а таксама абмену вопытам і думкамі па шырокім спектры навуковых пытанняў. Арганізатар канферэнцыі - Савет маладых вучоных НАН Беларусі.-0-
