12 ліпеня, Мінск /Кар. БЕЛТА/. Японія змяніла каранцінныя меры для прыбываючых у краіну беларусаў, паведамляе БЕЛТА са спасылкай на сайт Міністэрства спорту і турызму Беларусі.
"МЗС Японіі праінфармавала, што ў сувязі з выяўленнем у Беларусі штаму "Дэльта" каранавіруснай інфекцыі COVID-19 з 0.00 па такійскім часе 9 ліпеня 2021 года на грамадзян, якія прыбываюць у Японію з Беларусі, распаўсюджваецца абавязковы трохдзённы каранцін у гасцініцы, якая вызначаецца каранціннай станцыяй порта прыбыцця. На першы і трэці дні знаходжання праводзіцца абавязковае ПЛР-тэсціраванне, і пры двух адмоўных рэзультатах грамадзяне могуць пакінуць гасцініцу і прадоўжыць праходзіць стандартную 14-дзённую самаізаляцыю ва ўласным жыллі", - гаворыцца ў паведамленні.
У міністэрстве таксама дадалі, што захоўваецца неабходнасць прад'яўляць пры пагранічным кантролі сертыфікат аб адмоўным рэзультаце ПЛР-тэсту на COVID-19, выкананым не раней, чым за 72 гадзіны да вылету ў Японію.
Як адзначылі ў Мінспорту, каманда беларускіх плыўцоў першай прыбыла ў Японію 11 ліпеня. Да пачатку Гульняў атлеты будуць знаходзіцца ў трэніровачным лагеры ў Амагасакі.-0-
