Якім будзе надвор'е ў Беларусі зімой, расказалі сіноптыкі

3 снежня, Мінск /Кар. БЕЛТА/. Якім будзе надвор'е ў Беларусі зімой і ці чакаць пастаяннага снежнага покрыва, расказала на прэс-канферэнцыі начальнік службы метэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Таццяна Чатырка, перадае карэспандэнт БЕЛТА.

Беларускія сіноптыкі супрацоўнічаюць з калегамі з гідраметслужбаў краін СНД у рамках Паўночна-Еўразійскага кліматычнага цэнтра. Двойчы ў год - у канцы вясны і ў канцы восені - збіраецца Паўночна-Еўразійскі кліматычны форум для складання кансэнсуснага прагнозу на лета ці зіму. На зіму 2024-2025 гадоў такі прагноз таксама складзены.

"На нашай тэрыторыі з вялікай доляй верагоднасці (больш за 50 працэнтаў) зіма 2024-2025 гадоў будзе ў цэлым цёплай. Што датычыцца ападкаў, чакаецца, што іх колькасць будзе ў межах кліматычнай нормы. Але з-за таго, што тэмпература будзе павышана, ёсць верагоднасць таго, што ападкі ўсё ж такі будуць больш у змешанай і вадкай фазе. На падставе доўгатэрміновых прагнозаў на працяглае высокае снежнае покрыва пакуль разлічваць не даводзіцца. Але акцэнтую ўвагу на тым, што на працягу зімовага перыяду, як гэта характэрна для нашага тыпу клімату, будуць і маразы, і снег, і даволі высокія тэмпературы. Але загадзя сказаць дакладныя дні немагчыма", - адзначыла Таццяна Чатырка.-0-