Скрыншот відэа "Беларусь 1"
19 верасня, Мінск /Кар. БЕЛТА/. У фільме "Забойная змова. Мэта - Лукашэнка" на тэлеканале "Беларусь 1" Юрый Зянковіч, які быў асуджаны на 11 гадоў пазбаўлення волі ў верасні 2022 года за арганізацыю змовы з мэтай захопу дзяржаўнай улады, папрасіў Прэзідэнта Беларусі Аляксандра Лукашэнку аб памілаванні, паведамляе БЕЛТА.
Юрый Зянковіч разлічвае на тое, што не будзе да канца тэрміну знаходзіцца за кратамі: "Я з’яўляюся грамадзянінам ЗША, але з лета 2021 года я нічога не чуў аб прадстаўніках Злучаных Штатаў, якія спрабавалі б са мной звязацца. Я так разумею, адміністрацыя Байдэна наогул нічога не зрабіла за гэтыя тры з паловай гады".
Адказваючы на пытанне аб тым, ці прыходзілі да яго прадстаўнікі спецслужбаў ЗША з прапановай супрацоўніцтва, Юрый Зянковіч заявіў, што аднойчы да яго прыходзілі тры чалавекі. Двое паказалі пасведчанні ФБР, а трэці, мяркуе Юрый Зянковіч, быў супрацоўнікам ЦРУ. "Я запрасіў іх у канферэнц-залу, дзе мы сустракалі кліентаў. Першае пытанне было: у нас ёсць інфармацыя, што вы працуеце на КДБ. Я гавару: не, не працую. Вы гатовы прайсці дэтэктар хлусні? Я гавару, што калі трэба, то прайду. А як вы пагледзіце на прапанову папрацаваць на ўрад? Я пытаюся: урад Злучаных Штатаў? Адказваюць, што так", - адзначыў ён.
Юрый Зянковіч заявіў: тое, што ён спрабаваў зрабіць тры з паловай гады таму, было памылкай. Акрамя таго, дадаў ён, адсутнасць у змоўшчыкаў вопыту кіраўніцкай дзейнасці, хутчэй за ўсё, не дазволіла б утрымаць краіну ад скочвання ва ўзброены канфлікт, які цяпер палае ва Украіне. "Ні ў кога з нас не было вопыту вядзення перагавораў, параўнальнага з вопытам Лукашэнкі. Лукашэнка за апошнія два гады правёў бліскучую работу, прадухіліўшы ўцягванне Беларусі ў вайну. Гэта, безумоўна, яго плюс, і я не саромеюся гэтага гаварыць, хоць усе ведаюць мяне як крытыка існуючай улады. Але я заўсёды аддаю належнае сваім праціўнікам. У гэтым выпадку Лукашэнка зрабіў вельмі добрую работу. Калі б мы прыйшлі да ўлады, то хутчэй за ўсё нам бы не ўдалося пазбегнуць уцягвання Беларусі ў вайну", - упэўнены ён.
Адзіны спосаб пазбегнуць таго, каб у краіне рваліся снарады – гэта захоўваць мір у дзяржаве і пазбягаць любых міжнародных і ўнутраных канфліктаў, лічыць Юрый Зянковіч. "У сувязі з гэтым я яшчэ раз прызнаю сваю віну. Прашу прабачэння ў Аляксандра Рыгоравіча Лукашэнкі за тое, што я спрабаваў зрабіць. Хацеў бы скарыстацца выпадкам і звярнуцца да яго з просьбай памілаваць мяне і даць мне магчымасць вярнуцца да сям’і, блізкіх у Злучаныя Штаты. Вярнуцца да маёй прафесійнай дзейнасці. Таксама, паколькі я грамадзянін ЗША, хацеў бы звярнуцца да кандыдатаў у Прэзідэнты ЗША Камалы Харыс і Дональда Трампа, пасадзейнічаць майму хутчэйшаму вяртанню ў Злучаныя Штаты. У штат Тэхас, горад Х’юстан, дзе мая сям’я пражывае да сённяшняга дня", - сказаў Юрый Зянковіч.-0-
Падпісвайцеся на нас у
