29 снежня, Мінск /Кар. БЕЛТА/. Усебеларускі народны сход - найвышэйшая форма дэмакратыі. Такое меркаванне выказаў намеснік старшыні Савета Рэспублікі Анатоль Ісачанка, адказваючы на пытанні журналістаў аб чаканнях ад VI Усебеларускага народнага сходу, перадае карэспандэнт БЕЛТА.
"Цяпер ідзе рабочы працэс: арганізаваны дыялогавыя пляцоўкі, выбіраюцца дэлегаты. Як было анансавана кіраўніком дзяржавы, дэлегаты павінны прадстаўляць усе слаі насельніцтва - гэта інтэлігенцыя, рабочы клас, моладзь, нашы паважаныя старэйшыны. Гэта павінны быць кампетэнтныя людзі, якія сапраўды будуць выказваць свой пункт гледжання, прапаноўваць шляхі развіцця нашай краіны. Вядома, мы ўсе чакаем ад Усебеларускага народнага сходу эпахальнасці, калі можна так сказаць. Беларускае веча і народ прымаюць лёсавызначальнае рашэнне для краіны, вызначаюць шляхі развіцця, стратэгічныя напрамкі", - сказаў Анатоль Ісачанка.
Паводле яго слоў, беларусы даволі актыўна ўносяць прапановы да УНС. "Іх палітра вельмі разнастайная. На сённяшні дзень унесена каля 10 тыс. Вядома, іх трэба цяпер усе сакумуляваць, - адзначыў намеснік старшыні Савета Рэспублікі. - На маю думку, самае галоўнае - людзі неабыякавыя, яны абмяркоўваюць, уносяць прапановы. Таму што гэта будучыня нашай краіны і нам усім разам трэба прымаць рашэнні. На маю думку, Усебеларускі народны сход - гэта найвышэйшая форма дэмакратыі".
VI Усебеларускі народны сход пройдзе 11-12 лютага 2021 года ў Мінску. На абмеркаванне яго ўдзельнікаў будуць вынесены асноўныя палажэнні Праграмы сацыяльна-эканамічнага развіцця Беларусі на 2021-2025 гады і напрамкі грамадска-палітычнага развіцця краіны. Агульная колькасць удзельнікаў і запрошаных складзе 2700 чалавек.-0-
