ДЗЯРЖОРГАНЫДЗЯРЖОРГАНЫ
Серада, 20 студзеня 2021
Мінск Пераменная воблачнасць -11°C
Усе навіны
Усе навіны
Грамадства
13 студзеня 2021, 14:37

Ініцыятывы ФПБ па падтрымцы работнікаў і асобных галін пры пандэміі замацаваны заканадаўча

Фота з архіва
Фота з архіва

13 студзеня, Мінск /Кар. БЕЛТА/. Ініцыятывы Федэрацыі прафсаюзаў Беларусі па падтрымцы работнікаў і асобных галін ва ўмовах пандэміі замацаваны ў заканадаўстве. Аб гэтым БЕЛТА паведамілі ў прэс-службе ФПБ.

Прапановы былі распрацаваны з улікам запытаў, што паступаюць ад працоўных калектываў, і дэталёва прапрацаваны з усімі зацікаўленымі ведамствамі. Шэраг з іх сёння рэалізаваны ў рамках змяненняў указа Прэзідэнта ад 24 красавіка 2020 года нумар 143 "Аб падтрымцы эканомікі". У прыватнасці, для наймальніка вызначана права прадастаўляць работніку з яго згоды водпуск для знаходжання ў рэжыме самаізаляцыі ў месцы, якое вызначаецца наймальнікам. Працягласць водпуску вызначаецца па пагадненні бакоў працоўнага дагавора. За перыяд водпуску работнiку захоўваецца заработная плата ў памеры не ніжэйшым за ўстаноўленую тарыфную стаўку (тарыфны аклад), за аклад, калi iншае не ўстаноўлена калектыўным дагаворам, пагадненнем.

"Пры распрацоўцы гэтых прапаноў прафсаюзамі ўлічаны і замежны вопыт, дзе такая практыка выкарыстоўваецца даволі актыўна. У гэтым выпадку ідзе размова пра магчымасць часовага стварэння з ліку асобных катэгорый работнікаў "падменнага працоўнага рэзерву" на выпадак выбывання асноўнага персаналу па прычыне інфіцыравання COVID-19, - адзначылі ў прэс-службе. - У першую чаргу гэта актуальна для прадпрыемстваў рэальнага сектара эканомікі з бесперапынным цыклам вытворчасці, а таксама якія маюць выбухова- і пажаранебяспечныя ўстаноўкі, работы на якіх выконваюцца абмежаванай колькасцю высокакваліфікаваных спецыялістаў. У выпадку выбывання асноўнага персаналу па прычыне захворвання магчыма рассяленне работнікаў падменнага рэзерву, напрыклад, у ведамасных санаторыях і гасцініцах ва ўмовах ізаляцыі і з мінімальным допускам абслуговага персаналу. Гэта дазваляе звесці да мінімуму верагоднасць інфіцыравання работнікаў і ў самы кароткі тэрмін пачаць выкананне працоўных функцый".

Акрамя таго, рэалізавана прапанова нацыянальнага прафцэнтра аб прадастаўленні работніку свабодных ад работы дзён у сувязі з хваробай без афармлення лістка непрацаздольнасці на тэрмін да трох каляндарных дзён сумарна. Пры гэтым захаванне сярэдняга заработку за перыяд вызвалення ад работы можа быць прадугледжана калектыўным дагаворам або іншым лакальным прававым актам арганізацыі, за выключэннем бюджэтных арганізацый і арганізацый, якія атрымліваюць субсідыі, работнікі якіх прыраўнаваны па аплаце працы да работнікаў бюджэтных арганізацый.

Як падкрэслілі ў ФПБ, вопыт замежных краін сведчыць, што такія меры садзейнічаюць зніжэнню ўзроўню захваральнасці ў працоўных калектывах за кошт узмацнення кантролю з боку наймальніка за ўмовамі працы і здароўем работнікаў.

Па прапанове прафсаюзаў таксама замацавана, што ў працоўны год, за які прадастаўляецца працоўны водпуск, уключаецца час прадугледжаных заканадаўствам водпускаў без захавання заработнай платы, якія прадстаўляюцца па ініцыятыве наймальніка, без абмежавання іх працягласці (пунктам 3 часткі 1 артыкула 164 Працоўнага кодэкса час адпачынкаў без захавання заработнай платы ўключаецца ў працоўны год, калі гэтыя водпускі не перавышаюць 14 каляндарных дзён).

Асобны блок прапаноў прафсаюзаў датычыўся падтрымкі прадпрыемстваў і галін, якія найбольш пацярпелі ва ўмовах пандэміі і адчуваюць неабходнасць у дзяржаўнай падтрымцы. У прыватнасці, размова ідзе пра сферы турызму, санаторна-курортнага лячэння, гасцінічнага бізнесу, аказання паслуг па грамадскім харчаванні.

У адпаведнасці са змяненнямі, унесенымі ва ўказ, на сённяшні дзень для суб'ектаў гаспадарання падоўжана магчымасць прадастаўлення падатковых ільгот па плацяжах у мясцовыя бюджэты і арэнднай плаце за зямельныя ўчасткі.

На першае паўгоддзе 2021 года перанесены тэрмін прадастаўлення растэрміновак пагашэння арэндных плацяжоў па адтэрміноўках, прадастаўленых у II і III кварталах 2020 года, а таксама прадастаўляюцца новыя адтэрміноўкі ў першым паўгоддзі 2021 года з растэрміноўкай пагашэння абавязацельстваў да канца года.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі