1 верасня, Мінск /Кар. БЕЛТА/. Ахвярамі кіберзлачынцаў часцей за ўсё становяцца жанчыны ва ўзросце старэйшым за 55 гадоў, паведаміў следчы па асабліва важных справах Следчага камітэта Дзмітрый Брадко ў час пасяджэння праекта БЕЛТА "Экспертнае асяроддзе" на тэму "Барацьба з кіберзлачыннасцю".
"У Следчым камітэце правялі аналіз учынення злачынстваў па розных напрамках, аналіз сацыяльна-дэмаграфічных характарыстык пацярпелых: гэта жанчына ва ўзросце старэйшым за 55 гадоў, як правіла, пенсіянерка. Адпаведна, гэта нашы мамы і бабулі, якім мы дорым тэлефоны, падключаем сацыяльныя сеткі, але не тлумачым, як правільна імі карыстацца. Элементарная лічбавая дасведчанасць, лічбавая бяспека пенсіянерам не тлумачыцца. Прафілактыка - гэта асноўнае, - сказаў Дзмітрый Брадко. - Пастаянна паўтараецца "не перадавайце рэквізіты банкаўскіх картак, кідайце трубку, калі гэта падазроны званок". Але, на жаль, людзі прадаўжаюць паддавацца на хітрасці злачынцаў".
У гэтым годзе Следчы камітэт падрыхтаваў метадычныя рэкамендацыі, прааналізаваўшы факты крадзяжу грашовых сродкаў у арганізацый, якія ажыццяўляюцца праз падмену банкаўскіх рэквізітаў. "Ёсць такая тэма, калі лжывае пісьмо прыходзіць на карпаратыўную пошту ад нібыта контрагента, які знаходзіцца за мяжой, што ў іх змяніліся рэквізіты рахункаў. На падставе гэтага Следчым камітэтам падрыхтаваны канкрэтныя ўказанні, што рабіць у такіх выпадках, якія ступені аховы павінны быць устаноўлены, якія антывіруснікі, - адзначыў следчы па асабліва важных справах. - Літаральна ў ліпені мінскае прадпрыемства рассталася з 200 тыс. еўра. Пры праверцы аказалася антывіруса на камп'ютары няма, сістэм бяспекі ніякіх няма, пароль на камп'ютар не ўстаноўлены. Больш таго, лагін і пароль ад электроннай пошты галоўнага бухгалтара запісаны на лістку, які прыклеены да манітора. Часта прадпрыемствы проста ставяцца абыякава да ўкаранення інструментаў па ахове. Не ставіцца нават антывірус, меры бяспекі не тлумачацца. Сёння вельмі актуальна менавіта ахова інфармацыі, ахова камерцыйнай тайны, фінансаў".
Як дадаў старшы оперупаўнаважаны па асабліва важных справах галоўнага ўпраўлення па процідзеянні кіберзлачыннасці Міністэрства ўнутраных спраў Аляксандр Ластоўскі, у народзе такая злачынная схема атрымала назву "чалавек пасярэдзіне". "Ёсць два свежыя прыклады гэтага года, калі прадпрыемствы, ажыццяўляючы перасылку дакументаў з рэквізітамі, плацежных даручэнняў, сталі ахвярамі такога злачынства. Трэцяя асоба, якая ўключылася ў перапіску і якая адсочвала перасылку рэквізітаў, у апошні момант змяніла рэквізіты аплаты. У выніку чаго вялікая сума грошай была адпраўлена махляру. Наша прадпрыемства чакае пацвярджэння ажыццёўленай аплаты, а яно не прыходзіць. Паколькі ў абодвух выпадках размова ідзе аб замежных партнёрах, аддаленых ад нас (Кітай, В'етнам), то з-за розніцы часавых паясоў часам немагчыма пацвердзіцца званком. У такіх выпадках неабходна шыфраваць пошту, якую вы перасылаеце, архіваваць. Пароль ад архіва пажадана нейкім чынам накіроўваць таму прадпрыемству, з якім вядзецца перапіска", - удакладніў ён.
"Таксама неабходна заўсёды звяраць рэквізіты таго, што і куды вы пераводзіце. Гэтыя два простыя правілы практычна на 100 працэнтаў могуць засцерагчы ад такіх непрыемнасцей, - упэўнены Аляксандр Ластоўскі. - Калі мы гаворым аб прадпрыемствах, нельга не ўспомніць усё яшчэ актуальную схему злачынстваў, калі службовыя асобы пакідаюць у камп'ютары на пастаянным захоўванні ключ электроннага лічбавага подпісу, калі праз завірусаваны камп'ютар невядомыя асобы атрымліваюць доступ да плацежных рэквізітаў, фарміруецца плацежнае даручэнне і з камп'ютара, калі там пакінута флэшка з лічбавым подпісам, выкрадаюцца грошы. Гэта схема класічная і да гэтага часу добра працуе".-0-
