4 верасня, Мінск /Кар. БЕЛТА/. Сумеснае пасяджэнне міністраў абароны краін СНД, Шанхайскай арганізацыі супрацоўніцтва і Арганізацыі Дагавора аб калектыўнай бяспецы, у якім прыняла ўдзел дэлегацыя Узброеных Сіл Беларусі на чале з міністрам абароны генерал-маёрам Віктарам Хрэніным адбылося сёння ў Маскоўскай вобласці. Аб гэтым паведамляе БЕЛТА са спасылкай на сайт Міністэрства абароны.
У час сумеснага пасяджэння кіраўнік беларускага абароннага ведамства выступіў з дакладам на тэму: "Аб міжнароднай і рэгіянальнай бяспецы, кансалідацыі намаганняў па прадухіленні пагрозы развязвання войнаў і ўзброеных канфліктаў, далейшым умацаванні ваеннага супрацоўніцтва ў сучасных умовах". У сваім выступленні міністр абароны адзначыў, што сярод асноўных фактараў, якія негатыўна ўплываюць на стан сучаснай архітэктуры міжнароднай бяспекі, варта вылучыць абвастрэнне ваенна-палітычных і эканамічных супярэчнасцей паміж дзяржавамі і ваенна-палітычнымі блокамі, неўрэгуляваныя рэгіянальныя канфлікты, спробы правядзення каляровых рэвалюцый, тэрарызм, наркатрафік і спадарожная ім арганізаваная злачыннасць. Таксама было падкрэслена, што падзеі, якія адбываліся ў Беларусі ў жніўні бягучага года, з'яўляюцца таго яркім прыкладам.
"Розныя дэструктыўныя сілы, падаграваемыя кіраўніцтвам такіх дзяржаў, як Польшча, Літва, Чэхія і Украіна, зрабілі спробы неканстытуцыйнай змены ўлады. Дзякуючы зладжаным дзеянням органаў дзяржаўнага кіравання і падтрымцы беларускім народам рашэнняў Прэзідэнта ўдалося выратаваць краіну ад беззаконня і самавольства", - сказаў Віктар Хрэнін. Міністр выказаў словы ўдзячнасці ваенна-палітычнаму кіраўніцтву Расіі і Кітая, а таксама іншым дзяржавам, якія прысутнічалі на сумесным пасяджэнні і аказалі дапамогу Беларусі ў няпросты для яе час.
Разам з гэтым у сваім выступленні міністр абароны таксама адзначыў, што цяпер пэўныя сілы на Захадзе, пацярпеўшы няўдачу ў спробе арганізацыі каляровай рэвалюцыі, пераходзяць ужо фактычна да форм і метадаў вядзення гібрыднай вайны супраць беларускай дзяржавы, прымяняючы пры гэтым беспрэцэдэнтныя меры дыпламатычнага і палітыка-эканамічнага націску. Сёння ідзе жорсткая барацьба за заваяванне інфармацыйнай перавагі.
Не застаецца ў баку і ваенны складнік. За апошнія гады ратацыйная групоўка НАТА ў суседніх з Беларуссю краінах вырасла ў 17 разоў (да 10 тыс. ваеннаслужачых). У непасрэднай блізкасці ад граніцы беларускай дзяржавы ажыццяўляецца канцэнтрацыя баявой тэхнікі і асабовага складу, у тым ліку арміі ЗША. Праходзяць буйнамаштабныя шматнацыянальныя вучэнні краін - членаў НАТА, колькасць якіх толькі ў гэтым годзе на тэрыторыі сумежных з Беларуссю дзяржаў НАТА павялічылася ў 5 разоў. Эпідэміялагічная сітуацыя ўнесла сур'ёзныя карэктывы ў іх фармат і маштаб, але такія планы не могуць не выклікаць трывогу. Гэта з'яўляецца выклікам бяспецы і стабільнасці не толькі для нашай дзяржавы, але і для ўсяго еўрапейскага рэгіёна.
"Мы вымушаны выпрацоўваць у адказ меры ваеннага характару, што і было прадэманстравана намі ў ходзе планавых мерапрыемстваў баявой падрыхтоўкі, якія праведзены ў непасрэднай блізкасці з межамі НАТА ў жніўні гэтага года", - заявіў міністр.
Віктар Хрэнін засяродзіў увагу таксама на тым, што з'яўляючыся паўнапраўным членам СНД, АДКБ і наглядальнікам у ШАС, Беларусь выступае за ўсебаковую актывізацыю ўзаемадзеяння паміж гэтымі арганізацыямі, уключаючы ваеннае і ваенна-тэхнічнае супрацоўніцтва. Асобна была адзначана важнасць прыняцця ў рамках праводзімага мерапрыемства сумеснай заявы з нагоды 75-годдзя Перамогі ў Вялікай Айчыннай вайне 1941-1945 гадоў і Другой сусветнай вайне.
"Для Беларусі, якая страціла ў час гэтай вайны трэць свайго насельніцтва, Дзень Перамогі - вялікае свяшчэннае свята. Мы добра ведаем цану гэтай Перамогі, таму так сур'ёзна ставімся да гісторыі, так дбайна адстойваем прынцыпы справядлівасці, сумленнасці і роўнасці. Тэма Перамогі павінна аб'ядноўваць нашы краіны, народы якіх удзельнічалі ў вайне на баку антыгітлераўскай кааліцыі, і садзейнічаць кансалідацыі намаганняў у барацьбе з сучаснымі выклікамі і пагрозамі", - адзначыў Віктар Хрэнін.
У фарматах СНД і АДКБ удзельнікі пасяджэння разгледзелі і зацвердзілі 15 рашэнняў у ваеннай, ваенна-навуковай і ваенна-тэхнічнай сферах. На палях правядзення пасяджэння адбылася нефармальная сустрэча міністра абароны Беларусі з членам Цэнтральнага ваеннага савета, членам Дзяржсавета, Міністрам абароны Кітайскай Народнай Рэспублікі генерал-палкоўнікам Вэй Фэнхэ, у ходзе якой бакі прааналізавалі стан бягучага супрацоўніцтва, а таксама абмеркавалі далейшыя перспектывы двухбаковага супрацоўніцтва. Разам з гэтым Віктар Хрэнін у рабочым парадку абмеркаваў стан міжведамаснага супрацоўніцтва, а таксама перспектывы яго далейшага развіцця з кіраўнікамі абаронных ведамстваў СНД, АДКБ, ШАС.
У рамках культурнай праграмы мерапрыемства кіраўнік беларускага абароннага ведамства наведаў галоўны храм Узброеных Сіл Расійскай Федэрацыі, музейны комплекс "Дарога Памяці", а таксама сумесна з іншымі ўдзельнікамі пасяджэння прыняў удзел ва ўскладанні кветак да манумента Маці Пераможцаў.-0-
