Хрэнін: Мінабароны неадкладна пачынае адвод войскаў на паўднёвых рубяжах у месцы пастаяннай дыслакацыі

13 ліпеня, Мінск /Кар. БЕЛТА/. Міністэрства абароны неадкладна пачынае адвод войскаў на паўднёвых рубяжах у месцы пастаяннай дыслакацыі. Аб гэтым заявіў журналістам міністр абароны Віктар Хрэнін па выніках нарады ў Прэзідэнта Беларусі Аляксандра Лукашэнкі па пытаннях забеспячэння ваеннай бяспекі краіны на паўднёвым напрамку, перадае карэспандэнт БЕЛТА.

"Мы бачым, што напружанне на паўднёвым аперацыйным напрамку спадае, таму па выніках нарады Прэзідэнт даручыў групоўку войскаў узмацнення паўднёвага аперацыйнага напрамку, аснову якога складаюць сілы спецыяльных аперацый, вывесці з прыгранічнай зоны і вярнуць у пункты пастаяннай дыслакацыі. Мы неадкладна пачынаем выкананне гэтай задачы", - растлумачыў міністр. Паводле яго слоў, на ранейшых месцах застануцца нязначныя дзяжурныя сілы і сродкі для маніторынгу абстаноўкі на паўднёвай граніцы.

Раней Беларусь была вымушана адрэагаваць на рост напружанасці на паўднёвых рубяжах, узмацніўшы ахову граніцы і ў тым ліку задзейнічаўшы не толькі пагранічнікаў, але і армейскія падраздзяленні. "У сувязі з тым, што мы назіралі пэўнае ўзмацненне груповак Украіны на граніцы, было прынята рашэнне адэкватнага рэагавання. Для гэтага сілы спецыяльных аперацый вывелі свае групоўкі ўзмацнення, - растлумачыў камандуючы сіламі спецыяльных аперацый Узброеных Сіл Беларусі Вадзім Дзенісенка. - Сілы спецыяльных аперацый пачалі выкананне задач у штатным рэжыме на загадзя падрыхтаваных рубяжах, якія былі падрыхтаваны два гады таму, і выконваюць задачы ў адпаведнасці з баявым распараджэннем".

Апошнім часам, паводле яго слоў, не назіраецца "ніякіх правакацыйных дзеянняў" з украінскага боку ў адносінах да Беларусі.-0-