18 мая, Мінск /Кар. БЕЛТА/. Халаднаватае дажджлівае надвор'е чакаецца ў Беларусі на гэтым тыдні, паведамілі карэспандэнту БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
"З 12 мая гаспадаром надвор'я ва Усходняй Еўропе стала арктычнае паветра. Ужо тыдзень сярэднясутачная тэмпература ў Беларусі на 3-7 градусаў ніжэй за кліматычную норму. На працягу бягучага тыдня надзеі на цяпло таксама не відаць. Паветраныя масы будуць у асноўным паступаць з паўночных шырот. Змяненне ў характары атмасферных працэсаў, некаторае пацяпленне, чакаецца толькі ў апошняй пяцідзёнцы мая", - сказалі ў Белгідрамеце.
У аўторак, 19 мая, надвор'е ў Беларусі ў асноўным будуць вызначаць франтальныя раздзелы, толькі ноччу па ўсходзе краіны будзе адчувацца ўплыў вобласці павышанага атмасфернага ціску. Будзе пераважаць воблачнае надвор'е. Ноччу па паўднёвым захадзе, раніцай і днём на большай частцы тэрыторыі краіны пройдуць дажджы, у асобных раёнах магчымы навальніцы. Вецер прагназуецца заходні, паўднёва-заходні ўмераны. Тэмпература паветра ноччу складзе ад плюс 1 па паўночным усходзе да 10 градусаў цяпла па паўднёвым захадзе краіны, месцамі чакаюцца замаразкі да мінус 2. Днём будзе 11-17 градусаў цяпла.
У сераду, 20 мая, пад уплывам няўстойлівых халаднаватых паветраных мас будзе воблачна з праясненнямі. Месцамі, пераважна па паўночным усходзе краіны, пройдуць кароткачасовыя дажджы, днём у асобных раёнах магчымы навальніцы. Вецер прагназуецца паўночна-заходні парывісты. Тэмпература паветра ноччу складзе 1-8 градусаў вышэй за нуль. Днём будзе 8-14 градусаў цяпла, па паўднёвым захадзе - да плюс 16.
У чацвер, 21 мая, захаваецца ўплыў халодных няўстойлівых паветраных мас, якія паступаюць з поўначы Еўропы. Будзе воблачна з праясненнямі. Ноччу па паўночным усходзе, днём на большай частцы тэрыторыі Беларусі пройдуць кароткачасовыя дажджы. Вецер прагназуецца паўночна-заходні, ноччу ўмераны, днём парывісты. Тэмпература паветра ноччу складзе 1-5 градусаў вышэй за нуль, месцамі чакаюцца замаразкі да мінус 3. Днём будзе 7-14 градусаў цяпла.
У пятніцу, 22 мая, месцамі, у асноўным ва ўсходніх і цэнтральных раёнах краіны, пройдуць кароткачасовыя дажджы, у начныя гадзіны па паўночным усходзе магчымы мокры снег. Вецер прагназуецца паўночны ўмераны. Тэмпература паветра ноччу складзе 1-6 градусаў вышэй за нуль, у асобных раёнах чакаюцца замаразкі да мінус 3. Днём будзе 8-15 градусаў цяпла, па захадзе - да плюс 17.
У суботу, 23 мая, ноччу будзе пераважна без ападкаў, днём па захадзе краіны пройдуць кароткачасовыя дажджы. Вецер прагназуецца паўночны з пераходам у дзённыя гадзіны на паўднёва-заходні ўмераны. Тэмпература паветра ноччу складзе 1-6 градусаў вышэй за нуль, у асобных раёнах чакаюцца замаразкі да мінус 3. Днём будзе 12-18 градусаў цяпла.
У нядзелю, 24 мая, месцамі пройдуць кароткачасовыя дажджы. Вецер прагназуецца паўднёва-заходні, заходні ўмераны. Тэмпература паветра ноччу складзе 3-9 градусаў вышэй за нуль. Днём будзе 13-18 градусаў цяпла, па захадзе Беларусі - на некалькі градусаў цяплей.-0-
