12 кастрычніка, Магілёў /Сяргей Кулягін - БЕЛТА/. V Форум рэгіёнаў Беларусі і Расіі - важная пляцоўка для выбудоўвання канструктыўнага і ўзаемавыгаднага дыялогу. Аб гэтым заявіў сёння на пленарным пасяджэнні губернатар Тульскай вобласці Аляксей Дзюмін, перадае карэспандэнт БЕЛТА.
Паводле слоў Аляксея Дзюміна, Беларусь і Тульская вобласць - надзейныя партнёры, правераныя часам. "Нас звязваюць цесныя гандлёва-эканамічныя адносіны і моцная дружба, - падкрэсліў губернатар. - Выбудавана зладжаная сістэма ўзаемадзеяння па многіх напрамках. Мы цесна супрацоўнічаем па забеспячэнні тульскіх аграрыяў беларускай сельскагаспадарчай тэхнікай, у прыватнасці трактарамі ААТ "МТЗ" і камбайнамі "Палессе".
Цесная кааперацыя складваецца ў бульбаводстве, у тым ліку вырошчванні сартоў беларускай бульбы, пастаўках сухіх бульбяных шматкоў. З Тульскай вобласці ў Беларусь пастаўляюцца чыгун, бытавая і прамысловая хімія, прамысловае абсталяванне. У сваю чаргу з Беларусі расійскі рэгіён імпартуе малако, вяршкі, мясную прадукцыю, шчэбень, тэкстыль, тавары бытавога прызначэння.
У Тульскай вобласці актыўна развіваюцца гандлёвыя прадпрыемствы, якія рэалізуюць беларускую прадукцыю, іх ужо каля 150. Толькі за дзевяць месяцаў бягучага года ў Туле праведзена каля 80 кірмашоў - удвая больш, чым тры гады таму. Добрай традыцыяй стала правядзенне сумесных канцэртаў, фестываляў. Наладжана супрацоўніцтва паміж тэхнікумамі, што выпускаюць спецыялістаў у харчовай галіне і сферы паслуг, вядзецца абмен студэнтамі і выкладчыкамі.
Актыўнаму развіццю дыялогу садзейнічае стварэнне міжрэгіянальнай групы па каардынацыі напрамкаў супрацоўніцтва паміж Тульскай вобласцю і Беларуссю. "Мы сустракаемся штогод і з прадстаўнікамі дзелавых колаў абмяркоўваем актуальныя пытанні, фарміруем планы супрацоўніцтва. Як вынік - заключэнне кантрактаў і рэалізацыя канкрэтных праектаў", - сказаў Аляксей Дзюмін.
11 кастрычніка ў Мінску прайшло чарговае пасяджэнне міжрэгіянальнай групы, на якім выпрацаваны канкрэтныя меры па ўзаемадзеянні ў сферы гандлю, вытворчай кааперацыі, АПК. У 2017 годзе тавараабарот паміж Тульскай вобласцю і Беларуссю склаў каля $167 млн, што на 84 працэнты больш, чым у папярэднім годзе. За студзень-верасень бягучага года тавараабарот ужо склаў $134 млн (прырост 12,8 працэнта). "На гэтым мы спыняцца не маем намеру, будзе нарошчваць намаганні, не толькі захоўваючы ўсё лепшае, але і знаходзячы новыя формы ўзаемадзеяння", - запэўніў Аляксей Дзюмін.-0-
