14 ліпеня, Масква /Эдуард Півавар - БЕЛТА/. Грамадзяне Беларусі з 14 ліпеня могуць уязджаць у Расію авіятранспартам без ПЛР-тэста. Гэта вынікае з пастановы галоўнага дзяржаўнага санітарнага ўрача РФ Ганны Паповай, апублікаванай 13 ліпеня на расійскім афіцыйным інтэрнэт-партале прававой інфармацыі, паведамляе БЕЛТА.
Дакументам унесены змяненні ў ранейшую пастанову галоўнага дзяржаўнага санітарнага ўрача Расійскай Федэрацыі ад 18 сакавіка 2020 года нумар 7 "Аб забеспячэнні рэжыму ізаляцыі ў мэтах прадухілення распаўсюджвання COVID-2019". Згодна з гэтымі змяненнямі цяпер патрабаванне аб наяўнасці пры сабе медыцынскага дакумента, які пацвярджае адмоўны вынік лабараторнага даследавання матэрыялу на COVID-19 метадам ПЛР, праведзенага не раней як за два каляндарныя дні да прыбыцця на тэрыторыю Расійскай Федэрацыі, не распаўсюджваецца на грамадзян Рэспублікі Беларусь.
У пастанове таксама гаворыцца, што яна ўступае ў сілу на наступны дзень пасля яе афіцыйнага апублікавання.
Як паведамлялася БЕЛТА, 4 ліпеня аператыўны штаб па папярэджанні завозу і распаўсюджвання каранавіруснай інфекцыі на тэрыторыі Расійскай Федэрацыі апублікаваў інфармацыю аб тым, што прынята рашэнне аб адмене патрабавання аб прадастаўленні вынікаў ПЛР-тэсціравання на COVID-19 для грамадзян Рэспублікі Беларусь пасля прыбыцця авіятранспартам у Расію. Пры гэтым адзначалася, што адпаведныя змяненні павінны быць унесены ў пастанову галоўнага дзяржаўнага санітарнага ўрача РФ.
"Аператыўным штабам прынята рашэнне аб адмене патрабавання аб прадастаўленні вынікаў ПЛР-тэсціравання на COVID-19 для грамадзян Рэспублікі Беларусь пасля прыбыцця авіятранспартам у Расію. Адпаведныя змяненні будуць унесены ў пастанову галоўнага дзяржаўнага санітарнага ўрача Расійскай Федэрацыі ад 18 сакавіка 2020 года нумар 7. Для іншых грамадзян патрабаванні аб прадастаўленні вынікаў ПЛР-тэсціравання захоўваюцца", - гаварылася ў паведамленні аператыўнага штаба.-0-
