31 студзеня, Мінск /Кар. БЕЛТА/. Вялікая гандлёвая сетка ў Беларусі падпісала пагадненне аб узаемадзеянні сацыяльна адказных кампаній. Тым самым сумесна з МАРГ, Міністэрствам прыроды і аховы навакольнага асяроддзя, а таксама экалагічнымі арганізацыямі Target99 і Цэнтр экалагічных рашэнняў дадзены старт праграме падтрымкі экалагічна дружалюбнага фермерства і вытворчасці прадуктаў харчавання, паведамілі БЕЛТА ў прэс-службе ПРААН у Беларусі.
Пагадненне аб узаемадзеянні сацыяльна адказных кампаній Беларусі ініцыявана мясцовым фондам "Добра", офісам сеткі Глабальнага дагавора ААН у нашай краіне.
Праграма будучых дзеянняў уключае стварэнне ў сетцы гіпермаркетаў даступных паліц для рамеснікаў і фермераў, адмову ад продажу пластыкавых пакетаў па выхадных і развіццё аматарскага спорту. Прадстаўнікі гандлёвай сеткі адзначаюць: эфект не прымусіць сябе чакаць, паколькі звычайна толькі за дзень у адным гіпермаркеце пакупнікі выкарыстоўваюць больш за 47 тыс. пластыкавых пакетаў. "Гандлёвыя сеткі павінны стаць лідарамі ў пытанні абарачэння такой упакоўкі, развіцці культуры выкарыстання шматразовых альтэрнатыў", - упэўнены ініцыятары. Калі спажыўцы яе адобраць, патэнцыяльна толькі ў адной гандлёвай сетцы можна знізіць рэалізацыю пластыкавых пакетаў на 55 млн штук у год.
Для мінімізацыі шкоды навакольнаму асяроддзю рытэйлер будзе праводзіць рэгулярныя экалагічныя акцыі па розных тэматыках: адмова ад рэалізацыі на касе пластыкавых пакетаў і замена іх на папяровыя аналагі па той жа цане, выключэнне з продажу пластыкавых трубачак, талерак і г.д.
Дырэктар фонду "Добра" Аляксандр Скрабоўскі адзначыў, што ўжо многія кампаніі стратэгічна задумваюцца аб тых выкліках, аб якіх гавораць ва ўсім свеце. Але да канкрэтных спраў пакуль даходзяць нямногія. Ён спадзяецца, што вопыт рытэйлера атрымае распаўсюджванне, а яго гандлёвыя аб'екты стануць паспяховай тэставай пляцоўкай, на базе якой змогуць быць рэалізаваны пілотныя экалагічныя праекты. Усе партнёры з ліку дзяржаўных органаў і грамадскіх аб'яднанняў гатовы падтрымаць любыя аналагічныя пачынанні.
Згодна з пастановай Міністэрства антыманапольнага рэгулявання і гандлю ад 2 верасня 2019 года нумар 72, у гандлёвых аб'ектаў павінны быць у наяўнасці мяшкі (пакеты), аднаразовы посуд, сталовыя прыборы з паперы, каб пакупнікі маглі самі выбіраць від упакоўкі. Гэта будзе садзейнічаць паэтапнаму пераходу ад выкарыстання поліэтыленавай упакоўкі да экалагічна бяспечных матэрыялаў.-0-
