Галоўнай тэмай маладзёжнай пляцоўкі на Александрыі стала 80-годдзе вызвалення Беларусі

6 ліпеня, Александрыя /Кар. БЕЛТА/. Галоўнай тэмай маладзёжнай пляцоўкі на Александрыі стала 80-годдзе вызвалення Беларусі, перадае карэспандэнт БЕЛТА.

Тэма 80-годдзя вызвалення Беларусі ад нямецка-фашысцкіх захопнікаў прайшла чырвонай ніткай праз усе тэматычныя пляцоўкі рэспубліканскага свята "Купалле" ("Александрыя збірае сяброў"). У прыватнасці, у гэтым годзе зменена канцэпцыя маладзёжнай пляцоўкі: установы сярэдняй спецыяльнай і вышэйшай адукацыі прадставілі не толькі вырабленую ў час адукацыйнага працэсу прадукцыю, але і праекты, накіраваныя на грамадзянска-патрыятычнае выхаванне, - музейныя экспазіцыі, тэматычныя пляцоўкі і фотазоны.
Так, у цэнтры маладзёжнай пляцоўкі размясцілася зона пад назвай "Партызанскі край" - стылізаваны інтэр'ер зямлянкі са зброевай майстэрняй і палявой кухняй. Тут пастараліся поўнасцю ўзнавіць партызанскі побыт часоў Вялікай Айчыннай вайны - на скорую руку збітыя лаўкі і сталы, няхітрае начынне і нават чырвоны сцяг. Побач аформлены тэматычныя фотазоны, дзе можна прымераць баявое адзенне, патрымаць у руках баян. Дарэчы, сімвал Перамогі - яблыневы цвет - упрыгожыў тут кожную палатку.
Маладзёжная пляцоўка дапоўнена інтэрактыўнай экспазіцыяй "Зброя і тэхніка Перамогі", дзе прадстаўлена камп'ютарная гульня, распрацаваная Магілёўскім політэхнічным каледжам. Тут жа размясцілася выстава "Кузня Перамогі" Магілёўскага дзяржаўнага машынабудаўнічага каледжа, у якую ўвайшлі фотаматэрыялы і ўзоры прадукцыі, што выраблялася ў гады вайны.

"Перыяд Вялікай Айчыннай вайны тут максімальна візуалізавалі, каб кожны наведвальнік змог дакрануцца рукамі да гісторыі і Перамогі, адчуў радасць вызвалення і мірнага неба", - падкрэслілі ў галоўным упраўленні па адукацыі Магілёўскага аблвыканкама.

Недалёка ад пляцоўкі прыпаркаваліся два музеі на колах - брэндзіраваныя аўтобусы з экспазіцыямі. Адна з іх прэзентуе міжнародны маладзёжны праект Магілёўскага аблвыканкама "Дарогамі памяці і славы". На гэтай жа пляцоўцы прэзентаваны экспазіцыі абласнога гісторыка-патрыятычнага пошукавага клуба "Віккру" і Магілёўскага абласнога ваенкамата - узоры зброі, рэканструктары-партызаны. У другім аўтобусе размясціўся выставачны праект "80 рэліквій Вялікай Айчыннай вайны" абласнога краязнаўчага музея імя Раманава.
"У гэтым годзе наш абласны музей аб'явіў конкурс сярод раённых музеяў на лепшы ваенны прадмет, - адзначыла намеснік дырэктара ўстановы культуры Аляксандра Буракова. - Па яго выніках мы стварылі выставу, якая ўключала 80 самых унікальных экспанатаў. У музейным аўтобусе ў нас прадстаўлены ўнікальныя матэрыялы, у тым ліку з запаснікаў пераможцаў конкурсу. Так, у экспазіцыі знаходзіцца каска і абразок з выявай Мікалая Цудатворца. Гэту каску знайшлі пошукавікі ў 2016 годзе ў Быхаўскім раёне, а калі вывучалі падшлемнік, знайшлі абразок. Яна ў нас на выставе выступае сімвалам веры, бо перад тварам смерці многія пачыналі верыць у Бога і насілі з сабой такія прадметы - маліліся і верылі, што застануцца ў жывых".

Таксама ў экспазіцыі - гімнасцёрка з Асіповіцкага раёна. "Яе знайшлі нядаўна пры зносе старога дома, як мяркуецца, яна належала байцу 1941 года, які, магчыма, знаходзіўся тут на лячэнні, - прадоўжыла Аляксандра Буракова. - Лёс гэтага байца невядомы, але ў 2024 годзе гімнасцёрка трапляе ў фонды Асіповіцкага музея, прымае ўдзел у конкурсе і займае першае месца як сімвал трагедыі пачатковага перыяду Вялікай Айчыннай вайны. Варта адзначыць, што гімнасцёрка суправаджала салдата на працягу ўсёй вайны, і яна - знакавы прадмет на нашай выставе".

Паводле слоў субяседніцы, нават на "Купалле" ў Александрыі, свяце нацыянальнай культуры, заўсёды ёсць месца памяці пра наша гістарычнае мінулае, і гэта тэма актуальна на фестывалі. "Мы павінны помніць, што цяпер можам сустракацца, праводзіць фестывалі. І ўсё гэта дзякуючы таму, што перамаглі ў вайне. На нашай зямлі няма акупантаў, і мы можам жыць свабодна - радавацца і весяліцца. Экспазіцыя яшчэ раз прымушае задумацца аб тым, што трэба берагчы мір".-0-