22 жніўня, Мінск /Кар. БЕЛТА/. Новыя напрамкі супрацоўніцтва Беларусі і Кітая будуць намечаны ў час сённяшніх перагавораў з кітайскім бокам. Аб гэтым заявіў прэм'ер-міністр Беларусі Раман Галоўчанка ў час афіцыйных перагавораў з прэм'ерам Дзяржаўнага савета КНР Лі Цянам, які наведвае Беларусь з афіцыйным візітам, перадае карэспандэнт БЕЛТА.
"Шчыра рады вітаць вас на беларускай зямлі. На сустрэчы ў Астане ў ліпені гэтага года кіраўнікі нашых дзяржаў дамовіліся, што ў час вашага візіту ў Беларусь мы зможам абмеркаваць усе канкрэтныя пытанні і намеціць новыя напрамкі супрацоўніцтва. У нашых руках знаходзяцца пытанні сацыяльна-эканамічнага развіцця нашых краін. Поўнасцю згодны са словамі, якія вы сказалі на завяршэнні сесіі Усекітайскага сходу народных прадстаўнікоў у сакавіку мінулага года. Большасць людзей не сочаць пастаянна за ростам ВУП, іх хвалююць рэчы, якія адбываюцца ў штодзённым жыцці: жыллё, занятасць, даходы, адукацыя, медыцынскае абслугоўванне. Таму ўрад павінен планаваць і ажыццяўляць сваю работу ў адпаведнасці з жаданнямі народа. Вельмі рады магчымасці абмеркаваць самыя важныя і адчувальныя пытанні, якія знаходзяцца на кантролі ў Прэзідэнта і ўрада Беларусі", - сказаў Раман Галоўчанка.
Адна з асноўных мэт гэтага візіту прэм'ера Дзяржсавета КНР у Беларусь - рэалізацыя важных дамоўленасцей, дасягнутых кіраўнікамі дзвюх дзяржаў. "Нам важна прадметна абмеркаваць пытанні фактычнага супрацоўніцтва, актуалізаваць яго", - падкрэсліў ён.-0-
Фота Сяргея Шэлега
Падпісвайцеся на нас у
