27 ліпеня, Мінск /Кар. БЕЛТА/. Сінэргія навуковага патэнцыялу беларускіх і расійскіх вучоных садзейнічае руху наперад. Аб гэтым заявіў прэм'ер-міністр Беларусі Раман Галоўчанка падчас сустрэчы з дэлегацыяй Нацыянальнага даследчага цэнтра "Курчатаўскі інстытут" (Расія) пад кіраўніцтвам прэзідэнта НДЦ Міхаіла Кавальчука, перадае карэспандэнт БЕЛТА.
"Упэўнены, што вы абмеркавалі з Прэзідэнтам Беларусі вельмі шырокае кола пытанняў, перспектыўныя напрамкі нашага супрацоўніцтва ў галіне ядзерных тэхналогій. Мне вельмі прыемна адзначыць, што сувязі паміж вучонымі нашых краін не толькі захаваліся, але і паспяхова развіваюцца. Думаю, што сёння ва ўрадзе мы можам абмеркаваць нашы асноўныя сумесныя задачы. Сфера, у якой вы працуеце, забяспечвае тэхналагічную і эканамічную бяспеку дзяржавы, яе навуковы суверэнітэт. У цяперашніх умовах вельмі важна сінэргія навуковых патэнцыялаў для фарсіраванага руху наперад. Мы вельмі рады, што Курчатаўскі інстытут аказвае шырокі спектр паслуг, выконвае комплекс работ па навуковым суправаджэнні БелАЭС", - сказаў Раман Галоўчанка.
Нацыянальны даследчы цэнтр "Курчатаўскі інстытут" - адзін з вядучых навуковых цэнтраў свету, міждысцыплінарная нацыянальная лабараторыя. Сярод асноўных напрамкаў дзейнасці цэнтра - бяспечнае развіццё ядзернай энергетыкі, кіруемы тэрмаядзерны сінтэз і плазменныя працэсы, ядзерная фізіка нізкіх і сярэдніх энергій, фізіка цвёрдага цела і звышправоднасць, мезонная хімія. Таксама ў цэнтры праводзяцца фундаментальныя і прыкладныя даследаванні ў галіне малекулярнай фізікі, фізічнай і неарганічнай хіміі, хімічнай фізікі, фізікі і хіміі плазмы, прамысловай бяспекі, экалогіі, элементнай базы мікраэлектронікі, інфарматыкі.-0-
