17 студзеня, Мінск /Кар. БЕЛТА/. На нарадзе ў Прэзідэнта Беларусі Аляксандра Лукашэнкі па пытаннях знешнегандлёвай дзейнасці ў 2025 годзе абмяркоўвалася развіццё адносін з пулам краін, зацікаўленых у супрацоўніцтве, і канкрэтныя тактычныя задачы. Аб гэтым па выніках мерапрыемства расказаў журналістам прэм'ер-міністр Раман Галоўчанка, перадае карэспандэнт БЕЛТА.
"Размова ішла ў асноўным аб нашай тактыцы работы па асобных напрамках знешнеэканамічнай дзейнасці. Не сакрэт, і Прэзідэнт пра гэта сказаў, што ёсць пул краін (і ён немалы), якія зацікаўлены, як і мы, у развіцці адносін ва ўсіх галінах: ад ваенна-тэхнічнага супрацоўніцтва да інвестыцыйнага, банкаўскага і гэтак далей. Паміж гэтымі пунктамі ляжыць вялікі пласт гандлю, інвестыцый, сумесных праектаў. Многія з іх маюць комплексны і стратэгічны характар. Таму далучаюцца ўсе структуры дзяржаўнай улады і кіравання, пачынаючы ад сілавікоў і заканчваючы фінансістамі", - растлумачыў кіраўнік урада.
Паводле яго слоў, падрабязна абмяркоўвалася выбудоўванне адносін з шэрагам дзяржаў-партнёраў у Афрыканскім, Азіяцкім рэгіёнах і канкрэтныя тактычныя задачы, якія давядзецца вырашаць і грамадзянскаму, і сілавому блоку ў бліжэйшы час для таго, каб Беларусь атрымала ад гэтага зразумелы і чаканы эфект.
У ходзе мерапрыемства таксама вялася размова аб тым, што ўжо ёсць значная колькасць запрашэнняў ад замежных краін для ўзаемных візітаў у бягучым годзе і на прэзідэнцкім, і на ўрадавым узроўні. "Абмяркоўвалі гэту тэматыку ў кантэксце расстаўлення пэўных прыярытэтаў для планавання знешнепалітычнай дзейнасці кіраўніцтва краіны", - сказаў Раман Галоўчанка.-0-
Падпісвайцеся на нас у
