Галоўчанка: краінам ЕАЭС неабходна сумесна рэагаваць на выклікі ў сферы харчбяспекі

3 чэрвеня, Смалявіцкі раён /Кар. БЕЛТА/. Краінам ЕАЭС неабходна сумесна рэагаваць на выклікі ў сферы харчовай бяспекі. Аб гэтым заявіў прэм'ер-міністр Беларусі Раман Галоўчанка ў час пленарнай сесіі "Харчовая бяспека Еўразійскага эканамічнага саюза", перадае карэспандэнт БЕЛТА.

"Тэма сесіі выбрана не выпадкова: забеспячэнню харчовай бяспекі ў сучасным свеце ўдзяляецца першарадная ўвага. Гэта пытанне сацыяльнай стабільнасці і, без перабольшання, самога існавання любога народа і дзяржавы. Яго сур'ёзнасць мы зразумелі дастаткова даўно, а ўведзеныя незаконныя санкцыйныя абмежаванні толькі пераканалі нас у правільнасці прынятага курсу на дасягненне самазабяспечанасці па ўсіх крытычных пазіцыях харчавання. Іншыя краіны, назіраючы за тым, як "вяршыцелі сусветных лёсаў" дзеля палітычнай кан'юнктуры разбураюць прывычныя гандлёвыя адносіны, усё выразней усведамляюць: знаходзіцца ў заложніках такой дэструктыўнай логікі, залежаць ад замежных пастаўшчыкоў, якія па ўказцы сваіх урадаў могуць адмовіць у пастаўках неабходнай прадукцыі, пасадачнага матэрыялу, тэхнікі гэта або прадуктаў харчавання, вельмі небяспечна. Мы ў ЕАЭС усведамляем: забеспячэнне харчовай бяспекі выходзіць за рамкі асобных дзяржаў і становіцца важнейшым складнікам інтэграцыі", - сказаў Раман Галоўчанка.

Ён падкрэсліў, што пытанні сумеснага рэагавання на глабальныя выклікі ў сферы агравытворчасці заслугоўваюць абмеркавання на самым высокім узроўні. "Менавіта таму сёння мы разам даём старт новай і вельмі запатрабаванай пляцоўцы", - рэзюмаваў прэм'ер-міністр.-0-