Галоўчанка: Беларусі і Пскоўскай вобласці трэба развіваць прамкааперацыю

29 жніўня, Пскоў /Кар. БЕЛТА/. Беларусі і Пскоўскай вобласці трэба развіваць прамкааперацыю. Аб гэтым заявіў прэм'ер-міністр Беларусі Раман Галоўчанка ў час сустрэчы з губернатарам Пскоўскай вобласці Міхаілам Вядзернікавым, паведамляе карэспандэнт БЕЛТА.

Ключавым напрамкам для развіцця супрацоўніцтва з'яўляецца прамысловая кааперацыя. "Шмат прамысловай прадукцыі пастаўляецца з Беларусі ў Пскоўскую вобласць. Ідзе адваротны паток вузлоў, агрэгатаў, запасных частак з пскоўскіх прадпрыемстваў на беларускія машынабудаўнічыя прадпрыемствы, якія ў сваю чаргу пастаўляюць тэхніку ў Пскоўскую вобласць. Гэта значыць ідзе ўзаемаабмен матэрыяльнымі рэсурсамі. Мы задаволены супрацоўніцтвам, якое выбудавалася з партнёрамі з Пскоўскай вобласці ў сферы машынабудавання. Але я ўпэўнены, што гэты напрамак раскрыты яшчэ не да канца. Таму трэба засяродзіць увагу менавіта на сферы прамысловай кааперацыі. Задачы ў нас адны і тыя ж - імпартазамяшчэнне, лакалізацыя, тэхналагічная незалежнасць. Прадпрыемствы павінны актыўней працаваць адно з адным і глядзець далей наперад на тыя перспектыўныя ўзоры прадукцыі, якія будуць запатрабаваны праз 3, 5, 10 гадоў, дамаўляцца аб узаемадзеянні па тым ці іншым прадукце", - адзначыў кіраўнік беларускага ўрада.

"Буду рады заўтра наведаць прадпрыемства "Тытан-Палімер" і спадзяюся, што ў гэтыя дні будзе прынята рашэнне аб доўгатэрміновых пастаўках беларускай прадукцыі ў адрас гэтага сучаснага і перадавога завода", - дадаў Раман Галоўчанка.

Ён таксама звярнуў увагу на тое, што ў МАЗа добрая дынаміка супрацоўніцтва з пскоўскімі контрагентамі. "Дзякуй за аказаны давер пры выбары беларускай пасажырскай тэхнікі для мадэрнізацыі транспартнай сістэмы рэгіёна. Упэўнены, што аўтобусы асабліва вялікай умяшчальнасці вельмі спадабаюцца гараджанам і добра сябе пакажуць", - падкрэсліў прэм'ер-міністр.