24 лістапада, Мінск /Кар. БЕЛТА/. Звароты грамадзян наконт апрацоўкі персанальных даных павінны мець аб'ектыўны характар, заявіў журналістам дырэктар Нацыянальнага цэнтра абароны персанальных даных Андрэй Гаеў пасля круглага стала ў прэс-цэнтры БЕЛТА.
"Кожнаму грамадзяніну прадастаўлена права накіраваць да нас у цэнтр скаргу на тое, як аператар дзейнічае ў сувязі з апрацоўкай персанальных даных. Але трэба разумець, што гэтыя звароты павінны мець аб'ектыўны характар. Вядома, да кожнага з іх мы будзем патрабаваць прыкладання дакументаў і інфармацыі, што пацвярджаюць прыняцце рэальных мер чалавекам, каб урэгуляваць свае правы з аператарам належным чынам", - сказаў Андрэй Гаеў.
Што датычыцца ўзаемадзеяння з арганізацыямі, Нацыянальны цэнтр абароны персанальных даных не будзе займацца іх юрыдычным кансультаваннем. "Цэнтр не зможа і не павінен падмяняць работу адпаведных службаў і спецыялістаў", - падкрэсліў ён.
"Мы зможам метадалагічна дапамагчы ў выкананні патрабаванняў закона, калі ўзнікае нейкая сітуацыя, звязаная з сістэмным разуменнем таго, што ў той ці іншай сферы неабходна будзе зрабіць. Гэта можа быць аформлена ў выглядзе запыту і накіравана ў цэнтр. І мы адпаведным чынам будзем рэагаваць", - рэзюмаваў Андрэй Гаеў.-0-
