9 кастрычніка, Мінск /Кар. БЕЛТА/. Федэрацыя прафсаюзаў Беларусі трымае на пастаянным кантролі рост цэн на тавары і паслугі, паведаміў сёння журналістам старшыня ФПБ Міхаіл Орда, перадае карэспандэнт БЕЛТА.
"Цэны на тавары і паслугі мы кантралюем на пастаяннай аснове. Гэта важна, паколькі ўсе мы ходзім у магазіны і аплачваем розныя паслугі. Ад узроўню цэн залежыць і ўзровень жыцця нашых людзей. Таму прафсаюзы гэта пытанне трымаюць на пастаянным кантролі сумесна з МАРГ, Нацыянальным банкам, Нацыянальным статыстычным камітэтам. Мы дамовіліся з дэпутатамі Палаты прадстаўнікоў і членамі Савета Рэспублікі, што аб'яднаем нашы намаганні ў гэтым вельмі важным і патрэбным напрамку", - сказаў Міхаіл Орда.
Федэрацыя прафсаюзаў Беларусі штомесяц праводзіць маніторынг цэнавай сітуацыі ва ўсіх рэгіёнах краіны. Асаблівая ўвага ўдзяляецца прадуктам харчавання, якія чалавек спажывае практычна кожны дзень, - хлеб, малочныя прадукты, крупы, агародніна, птушка і мяса.
У сувязі з эпідсітуацыяй ФПБ вядзе таксама штотыднёвы прафсаюзны экспрэс-маніторынг цэн па 23 найменнях тавараў, якія карыстаюцца павышаным спажывецкім попытам. Удзяляецца ўвага іх наяўнасці і запасам у арганізацыях рознічнага гандлю. Паводле даных прафсаюзнага маніторынгу, у магазінах у дастатковай колькасці ёсць запасы прадуктаў, якія карыстаюцца павышаным попытам. Выключэнні маюць адзінкавы характар.
"У цэлым цэны паводзяць сябе даволі стабільна. Без рэзкіх скачкоў. Але, тым не менш, ёсць групы тавараў, якія падраслі ў цане", - адзначыў старшыня ФПБ.
У прыватнасці, у адпаведнасці з аналізам даных прафсаюзнага маніторынгу, у верасні ў параўнанні з цэнамі аналагічнага перыяду 2019 года цэны на большасць тавараў штодзённага попыту практычна засталіся на ранейшым узроўні або ўкладваюцца ў паказчыкі бягучай інфляцыі. Разам з тым зафіксаваны рост цэн на такія прадукты, як крупы грэцкія - больш за 60 працэнтаў, алей - каля 12 працэнтаў, селядзец салёны - 14 працэнтаў, фрукты - 31 працэнт.
"Ёсць умова, прапісаная ў генеральным пагадненні паміж прафсаюзамі, урадам і наймальнікамі. Калі не растуць даходы насельніцтва - не растуць і цэны. Паколькі ў чалавека павінна быць адпаведная пакупная здольнасць. Вось чаму гэта пытанне сёння вельмі важнае. Мы ім займаліся і будзем займацца", - падкрэсліў Міхаіл Орда.
Акрамя таго, у Федэрацыі прафсаюзаў працуе гарачая лінія па пытаннях цэнавай сітуацыі на спажывецкім рынку. Пазваніць на яе можна з панядзелка па пятніцу з 10.00 да 12.00 і з 14.00 да 16.00 па тэлефоне 8 (017) 203-95-62. "Мы просім усіх грамадзян уключацца ў гэту работу. Паведамляйце нам аб фактах неабгрунтаванага росту цэн. Мы будзем, наколькі гэта магчыма, аператыўна разам з вамі наводзіць парадак, глядзець, чаму гэтыя цэны выраслі і якія для гэтага ёсць падставы", - сказаў на заканчэнне Міхаіл Орда.-0-