22 жніўня, Мінск /Кар. БЕЛТА/. Неабгрунтаваная розніца ў кошце базавых тавараў для школьнікаў да новага навучальнага года па рэгіёнах недапушчальная, заявіў старшыня Федэрацыі прафсаюзаў Беларусі Міхаіл Орда на пасяджэнні экспертнага савета па пытаннях цэн і тарыфаў, паведамілі БЕЛТА ў прэс-службе ФПБ.
Рэспубліканскі камітэт Беларускага прафсаюза работнікаў гандлю, спажывецкай кааперацыі і прадпрымальніцтва сумесна з тэрытарыяльнымі арганізацыямі і раённымі аб'яднаннямі прафсаюзаў правёў маніторынг кошту адзення, абутку, канцылярскіх і пісьмовых тавараў для школьнікаў. Аналізавалася сярэдняя цана на базавы набор ад прадстаўленых на рынку вытворцаў. Бралі ў разлік пінжак, камізэльку, касцюм-двойку і тройку, спартыўны касцюм, туфлі, кеды, красоўкі, кашулю і блузу з доўгім і кароткім рукавом, канцылярскія і пісьмовыя прылады для вучняў рознага ўзросту.
Высветлілася, што ў Мінску даражэй за ўсё сабраць у школу старшых і малодшых школьнікаў (як дзяўчынак, так і хлопчыкаў). Так, на старшакласніцу сталічным бацькам давядзецца аддаць каля Br1192, у той час як у Брэсцкай вобласці прыкладна такі ж камплект абыдзецца ў памеры Br774. На вучня малодшых класаў мінская сям'я напярэдадні новага навучальнага года патраціць каля Br1064, а віцебская - Br553.
У сувязі з гэтым Міхаіл Орда адзначыў, што базавыя тавары для школьнікаў да новага навучальнага года не павінны каштаваць у Мінску амаль удвая даражэй, чым у Віцебскай або Брэсцкай вобласці. "На наш погляд, такія перакосы недапушчальныя, паколькі і ў сталіцы жывуць сем'і з розным узроўнем даходаў. Начынне школьных рукзакоў па ўсёй краіне адно і тое ж. Чаму ж сталічная сям'я павінна пераплачваць практычна ўдвая?" - задаў пытанне старшыня ФПБ.
МАРГ прааналізуе гэту праблему і аб выніках праінфармуе ўдзельнікаў экспертнага савета і грамадскасць.
Экспертны савет па цэнах і тарыфах прадаўжае пільна сачыць за змяненнем цэн на малако, мяса, плодаагароднінную прадукцыю. Федэрацыя прафсаюзаў і МАРГ дамовіліся ў канцы кастрычніка - пачатку лістапада, калі будзе сабраны ўраджай і адбудзецца закладка стабілізацыйных фондаў, правесці сумесныя сустрэчы на ўзроўні аблвыканкамаў, каб канкрэтызаваць перадумовы да змянення цэн на сельскагаспадарчую прадукцыю і паставіць максімальную заслону неабгрунтаванаму іх росту.-0-
