17 сакавіка, Мінск /Кар. БЕЛТА/. У Мастацкай галерэі Міхаіла Савіцкага (г. Мінск, пл. Свабоды, 15) 17 сакавіка адкрылася фотавыстава БЕЛТА "Мяжа паміж жыццём і смерцю" пры падтрымцы Цэнтра "Сістэмная праваабарона", перадае карэспандэнт БЕЛТА.
Выстава складаецца з больш як 100 фатаграфій, на якіх адлюстраваны рэальныя гісторыі і лёсы мігрантаў з розных краін, у тым ліку дзяцей. Галоўная задача аўтараў выставы - расказаць з дапамогай здымкаў пра міграцыйны крызіс, паказаць рэальную сітуацыю на беларуска-польскай граніцы.
20 сакавіка фотавыстава "Мяжа паміж жыццём і смерцю" прадоўжыць сваю работу ў фае чыгуначнага вакзала Мінска (Прывакзальная плошча, 3). Фатаграфіі будуць экспанавацца тут да 26 сакавіка. З 27 сакавіка па 2 красавіка фотавыстава "Мяжа паміж жыццём і смерцю" будзе прадстаўлена ў будынку Нацыянальнага аэрапорта Мінск. На працягу ўсяго часу экспазіцыя будзе працаваць без выхадных, уваход бясплатны.
"Гэта выстава вельмі важная. Яна паказвае сапраўды ўсю праўду аб тым, што адбываецца на граніцы ў польскіх лясах", - расказала намеснік дырэктара Цэнтра "Сістэмная праваабарона" Аксана Карнілава.
Паводле яе слоў, гэты праект павінны ўбачыць і жыхары іншых краін. "Ужо ёсць дамоўленасць з Расійскай Федэрацыяй. Першы горад будзе, хутчэй за ўсё, Смаленск, дзе мы плануем размясціць гэту выставу на цэнтральных вуліцах горада, каб з ёй магла азнаёміцца максімальна вялікая колькасць чалавек", - дадала Аксана Карнілава.-0-
