18 лістапада, Мінск /Кар. БЕЛТА/. Форум фіналістаў конкурсу маладых міжнароднікаў СНД імя А.А.Грамыкі, прымеркаваны да 75-годдзя Перамогі ў Вялікай Айчыннай вайне і стварэння ААН, адбудзецца 18-20 лістапада ў фармаце відэа-канферэнц-сувязі, паведамілі БЕЛТА арганізатары.
У гэтым годзе заяўкі прымаліся з 10 сакавіка па 11 мая. Неабходна было падрыхтаваць арыгінальную навуковую работу, прысвечаную праблемам захавання гістарычнай памяці аб Вялікай Айчыннай вайне, ролі ААН у сучасным свеце, інтэграцыйным працэсам і дыпламатыі на еўразійскай прасторы, Саюзнай дзяржаве, ЕАЭС, СНД. Да ўдзелу ў конкурсе было прынята 285 навуковых артыкулаў ад 323 маладых вучоных і спецыялістаў з 11 краін СНД.
Больш за ўсё заявак паступіла з Расіі - 145 конкурсных артыкулаў ад 170 канкурсантаў, і Беларусі - 65 конкурсных артыкулаў (у паўтара раза больш, чым у 2019) ад 72 канкурсантаў. З Казахстана, Арменіі, Кыргызстана, Малдовы, Таджыкістана, Узбекістана, Азербайджана, Туркменістана і Украіны паступіла 73 конкурсныя артыкулы ад 79 канкурсантаў. Акрамя прадстаўнікоў краін СНД, цікавасць да конкурсу выказалі грамадзяне Грузіі і Абхазіі. Работы ацэньваліся журы, у склад якога ўвайшлі больш за 30 экспертаў з 6 краін СНД. У фінал конкурсу выйшлі 50 удзельнікаў з 11 краін СНД, якія прадстаўляюць вядучыя нацыянальныя ўніверсітэты, інстытуты акадэмій навук, органы дзяржаўнай улады, грамадскія і бізнес-структуры.
Конкурс маладых міжнароднікаў СНД імя А.А. Грамыкі праводзіцца штогод з 2018 года. Яго арганізатарамі выступаюць Асацыяцыя знешнепалітычных даследаванняў імя А.А.Грамыкі, Акадэмія кіравання пры Прэзідэнце Беларусі і Інстытут Еўропы РАН. Праект рэалізуецца з выкарыстаннем гранта, прадастаўленага Міждзяржаўным фондам гуманітарнага супрацоўніцтва СНД.-0-
