19 жніўня, Мінск /Кар. БЕЛТА/. XVI Рэспубліканскі спартыўна-масавы фестываль для працуючай моладзі "Алімпія - 2022" пад слоганам "БРСМ: 20 гадоў разам!" стартуе сёння на тэрыторыі Валожынскага раёна ва ўрочышчы Дубы пад Ракавам, паведаміла карэспандэнту БЕЛТА сакратар Цэнтральнага камітэта Вераніка Гудкова.
"Фестываль шаснаццаты раз збірае сваіх сяброў. Упершыню "Алімпія" адбылася ў 2004 годзе па ініцыятыве БРСМ, неаднаразова перазагружалася і мяняла фармат. У гэтым годзе яе ўдзельнікамі стануць больш за 600 маладых людзей у складзе 18 каманд. Гэта выключна працуючая моладзь, актыў саюза моладзі. Прыемна адзначыць, што ў юбілейны год для Беларускага рэспубліканскага саюза моладзі - у верасні арганізацыі спаўняецца дваццаць гадоў, "Алімпія" прырасла новымі сябрамі. Гэта маладзёжныя дружыны "Беллегпрама", БЕЛАЗа, "Беларуськалія", "Белшыны", Магілёўскага завода ліфтавага машынабудавання, "Мінсктранса". Як бачыце, у асноўным гэта прамысловыя флагманы краіны, на якіх моладзі ўдзяляецца вялікая ўвага", - расказала Вераніка Гудкова.
Мерапрыемствы фестывалю прадоўжацца тры дні - з 19 па 21 жніўня, па трох асноўных напрамках: "Алімпія: разам за спорт!", "Алімпія: разам за творчасць!" і "Алімпія: разам за інтэлект!". "Праграма маладзёжнага спартыўна-масавага фэсту насычана рознымі відамі актыўнасцей. Сёння адбудзецца ўрачыстае адкрыццё "Алімпіі". Цэнтральным мерапрыемствам першага дня стане вялікі адкрыты дыялог "БРСМ: 20 гадоў разам!". У дыскусіі чакаецца ўдзел прадстаўнічых экспертаў, - дапоўніла яна. - Мы пастараліся разбавіць гэта мерапрыемства інтэрактывам. Усё ж такі гэта фестываль, і элементы шоу будуць дарэчы, дапамогуць правесці дыялог у нефармальнай абстаноўцы. Адразу пасля дыялогу ў рамках дзейнасці клуба інтэлектуальных гульняў ААТ "ААБ Беларусбанк" Плацінавая Сава" стартуе інтэлектуальны турнір "Алімпія-2022". Дарэчы, каманда галіновага камітэта БРСМ Беларусбанка - адзін з самых актыўных удзельнікаў фестывалю. Турнір складаецца з шасці тураў. Каманды гуляюць адначасова па прынцыпе: "Пытанне - "мазгавы штурм" - адказ", які будзе знойдзены шляхам лагічных і інтуітыўных разваг".
Першы фестывальны дзень завершаць конкурс на лепшую аўтарскую песню да 20-годдзя БРСМ і оpen-air "БРСМ: 20 гадоў разам!".
Сакратар ЦК БРСМ акцэнтавала ўвагу на спартыўным і творчым складніку другога дня фестывалю. "Ён будзе насычаны спартыўнымі чэмпіянатамі і творчымі конкурсамі - міні-футбол, валейбол, перацягванне каната, тэхніка пешаходнага турызму, сплаў на байдарках, спартыўная гульня "Узяцце горада", конкурсы бівуакаў, візітак і гатавання страў. Фінальным акордам другога дня "Алімпіі", бліжэй да вечара, стане ўрачыстае закрыццё фестывалю і ўзнагароджанне пераможцаў па выніках удзелу ў конкурсных выпрабаваннях. Традыцыйна па выніках спартыўнай і творчай праграм "Алімпіі" мы вызначаем пераможцаў: каманды, якія занялі І-ІІІ месцы ў кожнай асноўнай намінацыі, і каманда - абсалютны пераможца фестывалю", - рэзюмавала Вераніка Гудкова.
Праект "Алімпія" рэалізуецца БРСМ пры падтрымцы Міністэрства адукацыі і Мінскага аблвыканкама. Яго задачы - падрыхтоўка перспектыўнага маладзёжнага кадравага рэзерву, аб'яднанне працуючай моладзі праз адукацыйныя праграмы і дыскусійныя пляцоўкі, спартыўныя і культурныя спаборніцтвы.-0-
