23 лістапада, Мінск /Кар. БЕЛТА/. Другое пасяджэнне рабочай групы па распрацоўцы Канвенцыі аб прававым статусе дэлегацый, якія накіроўваюцца ў дзяржавы - удзельніцы Садружнасці, адбылося сёння ў Выканаўчым камітэце СНД у фармаце відэа-канферэнц-сувязі. Аб гэтым БЕЛТА паведамілі ў Выканкаме СНД.
У мерапрыемстве прынялі ўдзел прадстаўнікі прававых службаў знешнепалітычных ведамстваў Беларусі, Арменіі, Казахстана, Расіі, Таджыкістана, Узбекістана, а таксама прававога дэпартамента Выканкама СНД.
Дакумент прапрацоўваецца на аснове рашэнняў Кансультатыўнага камітэта кіраўнікоў прававых службаў міністэрстваў замежных спраў дзяржаў СНД. Канвенцыя, у прыватнасці, павінна ўрэгуляваць пытанні імунітэтаў членаў дэлегацый, а таксама парадак арганізацыі іх візітаў.
Рабочая група прадоўжыць разгляд праекта канвенцыі ў першым паўгоддзі 2021 года.-0-
