Эксперт: у апошнія гады амаль у два разы знізілася колькасць выяўленых сацыяльных сірот

9 кастрычніка, Мінск /Кар. БЕЛТА/. У апошнія гады амаль у два разы знізілася колькасць выяўленых дзяцей, так званых сацыяльных сірот. Аб гэтым у праекце БЕЛТА "Краіна гаворыць" на тэму "Кожнаму дзіцяці патрэбна сям'я" паведаміла намеснік начальніка ўпраўлення сацыяльнай, выхаваўчай і ідэалагічнай работы галоўнага ўпраўлення выхаваўчай работы і маладзёжнай палітыкі Міністэрства адукацыі Алена Сімакова.

"У Беларусі робіцца шмат што для таго, каб дзеці мелі магчымасць выхоўвацца ў роднай сям'і. У нашай краіне прыняты Дэкрэт нумар 18, згодна з якім усе дзяржаўныя органы працуюць на тое, каб захаваць родную сям'ю для дзіцяці. І ў гэтым пытанні нам шмат чаго ўдалося дасягнуць, паколькі калі параўноўваць 2007 і 2023 гады, то амаль у два разы знізілася колькасць выяўленых дзяцей, так званых сацыяльных сірот, якія засталіся без апекі бацькоў пры жывых родных бацьках. Так, у 2007 годзе іх было 4 тыс., у 2023 годзе - 2 тыс.", - расказала Алена Сімакова.

Паводле яе слоў, галоўнае ў гэтай рабоце - своечасова заўважыць сямейную нядобранадзейнасць і прыняць меры, каб сям'я захавалася. "Мы і цяпер прадаўжаем гэту работу. Была сфарміравана пастанова ўрада, згодна з якой кожны дзяржаўны орган ведае свае паўнамоцтвы ў тым, каб інфармаваць аб небяспецы для дзіцяці, калі яна ўзнікае ў сям'і", - растлумачыла намеснік начальніка ўпраўлення.-0-