Эйсмант аб "Першым інфармацыйным": умоўная сетка прадугледжвае, што выпуск навін будзе кожную гадзіну
 

13 верасня, Мінск /Кар. БЕЛТА/. Умоўная сетка вяшчання "Першага інфармацыйнага" прадугледжвае, што кожную гадзіну будзе выходзіць выпуск навін. Аб гэтым журналістам заявіў старшыня Белтэлерадыёкампаніі Іван Эйсмант, перадае карэспандэнт БЕЛТА.

Старшыня Белтэлерадыёкампаніі адзначыў, што яны адкрыты да прапаноў усіх партнёраў - як тэлевізійных кампаній, так і прыватнага бізнесу, які займаецца вытворчасцю тэлевізійнага кантэнту. "Мы будзем размяшчаць пэўныя прапановы на пляцоўцы, каб нам дапамагалі напаўняць наш эфір. Будзем разглядаць прапановы і рухацца ў гэтым напрамку. Тэлебачанне і так у нас у Беларусі арганізавана такім чынам, што не толькі мы вырабляем усё тое, што вы бачыце на экранах. Вельмі шмат робяць людзі, з якімі ў нас проста дагаворныя адносіны. Таму за гэтым будучыня. Магчымасці ў нас не бязмежныя, рук у кожнага дзве, таму для любых прапаноў адкрыты", - падкрэсліў ён.

Старшыня Белтэлерадыёкампаніі звярнуў увагу, што ўмоўная сетка вяшчання прадугледжвае выхад навін адзін раз у гадзіну. "Але гэты канал і каштоўны тым, што яго зорная гадзіна надыходзіць, калі ў краіне і свеце адбываюцца яркія падзеі. У нас развязаны рукі, нам не трэба чакаць гэты крок да наступнага выпуску навін, і мы можам адразу выходзіць у эфір", - дадаў ён.

Асноўнай місіяй тэлеканала Іван Эйсмант назваў інфармаванне людзей. "Прадаставіць як мага больш інфармацыі нашым людзям, якія знаходзяцца каля канала тэлевізара", - рэзюмаваў ён.

"Першы інфармацыйны" - гэта першы ў гісторыі айчыннага тэлебачання тэлеканал навін. Прадугледжваецца шматгадзіннае вяшчанне навін, у тым ліку прамыя ўключэнні з месцаў падзей, разгорнутае асвятленне ключавых грамадска-палітычных мерапрыемстваў, шырокая прысутнасць бізнес- і фінансавых навін, аўтарскай аналітыкі.