Дзясятая нарада міністраў адукацыі дзяржаў - членаў ШАС пройдзе ў Беларусі ў чэрвені

11 лютага, Мінск /Кар. БЕЛТА/. Дзясятая нарада міністраў адукацыі дзяржаў - членаў ШАС пройдзе ў Беларусі ў чэрвені. Аб гэтым паведаміў міністр адукацыі Беларусі Андрэй Іванец на падагульняючай калегіі ведамства, перадае карэспандэнт БЕЛТА. 

"Беларусь у 2026 годзе стане адной з пляцовак міждзяржаўнага супрацоўніцтва ў сферы адукацыі. Так, у чэрвені адбудзецца дзясятая нарада міністраў адукацыі дзяржаў - членаў Шанхайскай арганізацыі супрацоўніцтва. А восенню ў Мінску пройдзе 9-ы з'езд настаўнікаў і работнікаў адукацыі дзяржаў - удзельніц СНД", - праінфармаваў Андрэй Іванец. 

Ва ўстановах адукацыі краіны на гэты момант навучаюцца больш за 37 тыс. замежных студэнтаў. "Экспарт паслуг у галіне адукацыі за мінулы год склаў рэкордныя $199 млн, фактычна за пяцігодку мы ў два разы павялічылі гэты паказчык. Важна пры гэтым адзначыць, што нашымі вышэйшымі навучальнымі ўстановамі забяспечана істотнае павелічэнне праграм, рэалізаваных сумесна з нашымі калегамі з Расіі, Кітая, Узбекістана, Казахстана. Фактычна больш за 50 працэнтаў нашага экспарту выканана за кошт рэалізацыі англамоўных праграм. Гэту работу нам неабходна прадоўжыць", - падкрэсліў міністр.

Паводле яго слоў, для далейшага развіцця дасягнутага ўзроўню міжнароднай кааперацыі ў 2026 годзе патрабуецца забяспечыць дыверсіфікацыю беларускага экспарту і яго структуры. "Сёння мы бачым, что фактычна кожны трэці замежны студэнт - гэта прадстаўнік Кітая. Нам неабходна пашырыць экспартную карзіну тых паслуг, якія карыстаюцца попытам (англамоўныя праграмы, праграмы магістратуры для замежных грамадзян). Важна таксама правядзенне комплекснай работы з замежнымі студэнтамі - ад стадыі адбору да выпуску і апастылявання дакументаў аб адукацыі", - дадаў Андрэй Іванец.-0-