16 жніўня, Мінск /Кар. БЕЛТА/. У склад наглядальных саветаў акцыянерных таварыстваў павінны прыцягвацца найбольш вопытныя і кваліфікаваныя кадры. Такая пазіцыя Дзяржаўнага камітэта па маёмасці была агучана на сустрэчы са службовымі асобамі, назначанымі прадстаўнікамі дзяржавы ў органах кіравання адкрытых акцыянерных таварыстваў, паведамілі БЕЛТА ў Дзяржкамаёмасці.
Было адзначана, што карпаратыўнае кіраванне - гэта ў першую чаргу наладжванне эфектыўнай работы органаў кіравання, іх узаемадзеяння адзін з адным. На сустрэчы закраналіся пытанні, часцей за ўсё ўзнікаючыя на практыцы пры рэалізацыі прадстаўнікамі дзяржавы сваіх паўнамоцтваў.
У прыватнасці, прагучала падрабязная інфармацыя аб тым, хто ў адпаведнасці з законам аб гаспадарчых таварыствах можа ўваходзіць у склад наглядальнага савета (афіліраванасць паміж сабой яго членаў), былі растлумачаны механізм і паслядоўнасць дзеянняў пры выплаце ўзнагароды прадстаўніку дзяржавы. Абмяркоўвалася, ці можа мяняцца ў ходзе пасяджэння наглядальнага савета ўжо выпрацаваная і ўзгодненая з органамі ўладальніцкага нагляду пазіцыя прадстаўніка дзяржавы, якія на практыцы могуць узнікнуць цяжкасці пры правядзенні пасяджэнняў наглядальнага савета з вялікай колькасцю прадстаўнікоў дзяржавы ад розных органаў уладальніцкага нагляду.
У Дзяржкаммаёмасці таксама расказалі аб парадку дзеянняў пры спыненні паўнамоцтваў прадстаўніка дзяржавы і неабходнасці, у выпадку ўключэння прадстаўніка дзяржавы ва ўжо сфарміраваны наглядальны савет, правядзення ў таварыстве чарговага сходу акцыянераў, а таксама парадак адклікання прадстаўніка дзяржавы ў выпадку яго звальнення.-0-