17 снежня, Мінск /Кар. БЕЛТА/. Дзіцячыя паліклінікі (педыятрычныя аддзяленні паліклінік) перабудавалі работу на час павышанай захваральнасці на вострыя рэспіраторныя інфекцыі, паведамляе БЕЛТА са спасылкай на прэс-службу Міністэрства аховы здароўя.
У Брэсцкай вобласці, у прыватнасці, арганізаваны дзяжурствы медработнікаў і адміністрацыі ўстановы для пераразмеркавання патокаў пацыентаў і кансультавання па тэлефоне бацькоў. Зменены графікі работы ўрачоў з улікам дзён, на якія прыпадае пік зваротаў і выклікаў, перагледжаны рэжым работы педыятраў у сувязі з павелічэннем колькасці выклікаў дадому. У Баранавічах павялічылі колькасць урачоў-педыятраў для дзяжурстваў у выхадныя дні - суботу і нядзелю. Акрамя таго, прыцягнуты ўрачы-спецыялісты, урачы-інтэрны да прыёму пацыентаў і абслугоўвання выклікаў дадому.
У Віцебску прадоўжылі час работы дзіцячых амбулаторна-паліклінічных устаноў да 21.00, у Віцебску, Наваполацку і Оршы прыцягнулі для прыёмаў урачоў педыятрычных дашкольна-школьных аддзяленняў. У абласным цэнтры таксама дапамагаюць урачы-інтэрны і студэнты 5-6-х курсаў лячэбнага факультэта Медуніверсітэта.
У Гомелі і Гомельскай вобласці на перыяд росту захваральнасці на ВРІ сярод дзяцей да работы на прыёме ў паліклініках таксама прыцягнуты педыятры педыятрычных аддзяленняў, урачы-спецыялісты, урачы-інтэрны, памочнікі ўрачоў.
У Гродзенскай вобласці працуюць дадатковыя кабінеты неадкладнай дапамогі, дзе прымаюць урачы сумежных спецыяльнасцей. Медыцынскую дапамогу таксама аказваюць урачы-педыятры ўстаноў адукацыі. Рэарганізавана работа педыятраў, якія вядуць актыўны нагляд за хворымі дзецьмі дома да выздараўлення.
У дзіцячай паліклініцы Гродна рэарганізавана работа рэгістратуры. Запіс на прыём да вузкіх спецыялістаў вядзецца на прыёме ўрача, які назначыў гэту кансультацыю, з электроннага дзённіка ўрача. Перагледжаны прынцып запісу на паўторны прыём (запісвае спецыяліст на прыёме). Створаны кол-цэнтр са шматканальным тэлефонам для запісу на прыём і выкліку ўрача.
Даведкі на наведванне спартыўных секцый выдаюць па запатрабаванні. Спіс складае секцыя з пісьмовай згоды бацькоў і дакументы афармляюцца на падставе праведзенага дыспансернага агляду ў месяц нараджэння. Больш таго, у наведвальнікаў паліклінік цяпер ёсць магчымасць атрымаць шэраг медыцынскіх дакументаў без непасрэднай прысутнасці дзіцяці (заказ выпіскі і даведкі аб стане здароўя на сайце паліклінікі).
Прыём урачамі-спецыялістамі і правядзенне дыягнастычных даследаванняў (лабараторных даследаванняў, ЭКГ) магчымы ў суботу. Гэта датычыцца дзяцей з Гродна і Гродзенскага раёна незалежна ад месца пражывання. Адкрыты гарадскі педыятрычны арганізацыйна-метадычны кабінет. Бацькоў інфармуюць аб выкананых лабараторных даследаваннях на SARS-CoV-2 па электроннай пошце або СМС.
Для работы на амбулаторным прыёме прыцягнуты ўрачы-інтэрны, памочнікі ўрача і ў Мінскай вобласці. Пры неабходнасці дапамогу аказваюць урачы-педыятры педыятрычных аддзяленняў, загадчыкі педыятрычных аддзяленняў паліклінік, інфекцыяністы. Павялічаны час прыёму педыятраў, у рэгістратуры працуюць дадатковыя рэгістратары і медработнікі для маршрутызацыі пацыентаў. Павялічаны ложкавы фонд педыятрычных аддзяленняў для аказання стацыянарнай дапамогі дзецям - размова ідзе пра бальніцы ў Слуцку і Жодзіне.
У Мінску працуе 21 дзіцячая паліклініка і чатыры аддзяленні ў складзе паліклінік для дарослага насельніцтва. У асенне-зімовы перыяд у рабочыя дні яны адкрыты з 7.00 да 20.00, у суботу з 8.30 да 16.00.
Ва ўстановах аховы здароўя Магілёва і Магілёўскай вобласці, якія аказваюць амбулаторную медыцынскую дапамогу дзецям, таксама арганізаваны дадатковыя мерапрыемствы. У прыватнасці, ва ўсіх паліклініках рэгіёна арганізавана пераважнае абслугоўванне першасных выклікаў. Урачы-інтэрны педыятрычнага і агульнаўрачэбнага профілю накіраваны для работы ў дзіцячыя (змешаныя) паліклінікі для медабслугоўвання дзіцячага насельніцтва, урачы-спецыялісты дзіцячых паліклінік і ўрачы агульнай практыкі змешаных паліклінік - на прыёмы дзяцей у чырвонай зоне паліклінік, а таксама прыцягваюцца для абслугоўвання дзяцей дома.-0-
