9 чэрвеня, Мінск /Кар. БЕЛТА/. Дзень электратранспарту праходзіць у Мінску, перадае карэспандэнт БЕЛТА.
Выстаўка сабрала шырокае кола ўдзельнікаў: прамысловыя прадпрыемствы, навуковыя арганізацыі, кампаніі-імпарцёры электрамабіляў. У іх ліку - "БКМ Холдынг", МАЗ, МЗКЦ, ВА "Беларуснафта", Нацыянальная акадэмія навук Беларусі, СЗАТ "БЕЛДЖЫ", ТАА "МотаВелаЗавод", ААТ "Віцязь", ТАА "РЭНЕРА", ДВА "Белэнерга", кампаніі "Атлант-М Электрамабілі", Green cars, Electro-car, MultiMotors, E-power, SkyWell, "Аўтаідэя", "Белтэлекам", асацыяцыя перавозчыкаў і дыспетчараў таксі, каршэрынгавыя кампаніі і іншыя.
На выстаўцы прадстаўлены легкавы і грузавы электратранспарт, апошнія ўзоры айчынных электробусаў, элементы кампанентнай базы для электрамабіляў. Сярод навінак - перонны электробус МАЗ, першы электробус Volat Мінскага завода колавых цягачоў, шматфункцыянальны гарадскі электрагрузавік Нацыянальнай акадэміі навук, новая мадэль электрапагрузчыка "АМКАДОР" і іншыя.
Наведвальнікі могуць убачыць самыя папулярныя мадэлі электракараў, навінкі аўтарынку, атрымаць актуальную інфармацыю па пытаннях эксплуатацыі і сэрвіснага абслугоўвання электрамабіляў, даведацца аб развіцці ў краіне сеткі зарадных станцый.
Выстаўка праводзіцца штогод з мэтай пашырэння інфармацыі аб перавагах электрамабіляў як экалагічнага, эканамічнага, камфортнага віду транспарту. Арганізатарам мерапрыемства выступае Міністэрства энергетыкі сумесна з ВА "Беларуснафта" пры падтрымцы Мінгарвыканкама.
Як паведамілі ў Міністэрстве энергетыкі, сусветны рынак электратранспарту дэманструе ўстойлівы рост. Паводле апошніх даных Міжнароднага энергетычнага агенцтва, у 2022 годзе ў свеце было прададзена больш за 10 млн электрамабіляў, што на 55 працэнтаў больш, чым у 2021 годзе. Гэтаму садзейнічала агульнасусветная тэндэнцыя да дэкарбанізацыі, адмова буйных аўтаканцэрнаў ад вытворчасці аўтамабіляў з рухавікамі ўнутранага згарання. У выніку агульная колькасць электрамабіляў у свеце перавысіла 26 млн адзінак. Паводле прагнозаў, у 2023 годзе дадатная дынаміка захаваецца, продажы электракараў вырастуць на 35 працэнтаў да 14 млн.
Беларусь таксама прытрымліваецца агульнасусветных трэндаў - колькасць электратранспарту на дарогах краіны з кожным годам прырастае. Гэтаму садзейнічаюць стымулюючыя меры, прынятыя на ўзроўні дзяржавы: дзейнічаюць ільготы, сфарміравана сетка зарадных станцый - усяго іх каля 700. Па гэтым паказчыку Беларусь займае лідзіруючыя пазіцыі на прасторы СНД.-0-
