Віктар Кузняцоў
9 лістапада, Быхаўскі раён /Кар. БЕЛТА/. Кожная пара рук сёння каштоўная. Такім меркаваннем з журналістамі падзяліўся дырэктар Быхаўскага лясгаса Віктар Кузняцоў у час рэспубліканскай акцыі "Дай лесу новае жыццё!", удзел у якой прымае дэлегацыя Савета Міністраў на чале з Раманам Галоўчанкам, перадае карэспандэнт БЕЛТА.
"Аб'ём па нашым лясгасе значны. Кожны чалавек, кожная пара рук сёння каштоўная. Людзі працуюць практычна без выхадных. Ёсць задача па лесааднаўленні бураломных лесасек, што пастаўлена ўрадам і Прэзідэнтам. Аб'ёмы вялікія, таму без дапамогі нам проста не абысціся, - адзначыў ён. - Больш за 1,5 тыс. чалавек прынялі ўжо ўдзел па нашым лясгасе. Усім ўдзячны: дзяржаўным органам, грамадскім арганізацыям, арганізацыям раёна, прамысловасці, МНС, міліцыі, чыгунцы, моладзі, мытні, проста неабыякавым людзям. Спіс вялізны", - расказаў ён.
Расказаў Віктар Кузняцоў і пра тое, з якімі пачуццямі людзі прыязджаюць на высадку лесу. "Адны добраахвотнікі прыязджаюць першы раз, ім гэта ў навіну, нехта захацеў проста выехаць на прыроду. Але калі яны бачаць каварства прыроды, што яна нарабіла, яны з іншым падыходам, з іншым поглядам садзяць наш пасадачны матэрыял, які вырасцілі ў нашым гадавальніку, - адзначыў ён. - Самае галоўнае людзям растлумачыць, як высаджваць правільна, каб быў толк. Няхай яны пасадзяць 10-20 штук, але пасадзяць правільна. У Год якасці галоўнае пасадзіць якасна. Адзін сеянец сасны каштуе 20 капеек, елкі - 40, уявіце, колькі можа быць выкінутых дзяржаўных грошай".
Усяго ў Быхаўскім раёне трэба будзе аднавіць 400 га, для гэтага неабходна высадзіць больш за 2 млн сеянцаў елкі, сасны, бярозы. "Быхаўскі лясгас хвойны на 80 працэнтаў, хвою і больш вываліла ўраганам, таму такія культуры. Пароды, якія былі ў натуральным асяроддзі і якія найбольш запатрабаваны на рынку, трэба аднавіць, а асінай зарасце само", - рэзюмаваў ён.
9 лістапада дэлегацыя Савета Міністраў на чале з Раманам Галоўчанкам прымае ўдзел у рэспубліканскай акцыі "Дай лесу новае жыццё!" на тэрыторыі Быхаўскага раёна Магілёўскай вобласці. Гэты раён - самы пацярпелы ў рэгіёне ад летняй стыхіі. Работы па высадцы пройдуць на ўчастку 2,2 га: тут высадзяць 12,2 тыс. сеянцаў бярозы і сасны.-0-
Падпісвайцеся на нас у
