Другі дзень фестывалю ў Гродне: 19 нацыянальных падворкаў разгарнуліся ў гістарычным цэнтры (АБНАЎЛЯЕЦЦА)

8 чэрвеня, Гродна /Кар. БЕЛТА/. На 19 нацыянальных падворках, якія размесцяцца ў гістарычнай частцы горада, пакажуць свае традыцыі, творчасць, народныя кухні прадстаўнікі 36 нацыянальнасцей, перадае карэспандэнт БЕЛТА.

Самы вялікі фестывальны падворак - беларускі - запрасіў гасцей яшчэ ўчора. Увесь вечар тут было шматлюдна, весяла, цікава. Падворак беларусаў сёлета ўпершыню заняў дзве плошчы - Леніна і Тызенгаўза і сёння прапануе вельмі разнастайную, яркую праграму на ўвесь дзень. Тут прадставяць сваю творчасць усе вобласці Беларусі. Кожны рэгіён падрыхтаваў не толькі арыгінальную канцэртную праграму, але і свой асаблівы сімвал фестывалю, у якім увасоблены вобраз вобласці і пры гэтым абавязкова прысутнічае кветка-сяміпялёстка, якая аб'ядноўвае ўсю фестывальную сям'ю. Напрыклад, Гродзеншчына прадставіць вялікае пано ў стылі выцінанкі і пэчварку, у цэнтры якога размешчаны лагатып фестывалю. Інтэрнацыянальнае свята ў бягучым годзе праходзіць пад знакам сям'і, таму ўсе рэгіёны пакажуць свае сямейныя абрады і традыцыі. Гродзенцы запросяць гасцей на традыцыйны вясельны абрад.
Гасцінны беларускі падворак запросіць на сваю сцэну і беларусаў замежжа, якія ўдзельнічаюць у фестывалі. На свята ў Гродна прыехалі артысты беларускіх нацыянальных аб'яднанняў з Калінінграда, Бранска, Томска, Рыгі. Яны пакажуць, як захоўваюць і развіваюць сваю народную культуру па-за межамі гістарычнай радзімы.

Сюды ж варта на працягу дня зазірнуць мясаедам: на беларускім падворку разгорнецца фестываль "Галоўны па мясе".

Усе 19 нацыянальных падворкаў - рускі, кітайскі, украінскі, азербайджанскі, армянскі і іншыя - размесцяцца ў прыгожых месцах на дагледжаных і ўпрыгожаных да свята вуліцах Гродна. Тут, як заўсёды, будуць гучаць народныя песні, музыка, вершы, выступяць танцавальныя калектывы, пакажуць сямейныя абрады. І, вядома ж, кожны падворак будзе прывабліваць непаўторным пахам нацыянальных страў, якія можна будзе прадэгуставаць адразу на месцы за ўтульнымі столікамі.
Афіцыйнае адкрыццё свята адбудзецца ў 12 гадзін. І адразу ж следам за гэтым пачнецца кругаварот канцэртаў на падворках і на фестывальных сцэнах. Гэта прэзентацыі вядомых беларускіх творчых калектываў, гасцей са сталіцы і абласцей нашай краіны, выступленні замежных студэнтаў, якія вучацца ў гродзенскіх універсітэтах, і шмат іншага.

Урачыстая цырымонія закрыцця фестывалю адбудзецца на плошчы Савецкай у 16.00. Тут самым яркім і крэатыўным удзельнікам шматнацыянальнага свята ўручаць заслужаныя ўзнагароды.

У нядзелю ж на Аўгустоўскім канале, які ў бягучым годзе адзначае 200-годдзе, на пляцоўцы каля шлюза Дамброўка, гасцей чакаюць фаер-шоу, флэшмоб у нацыянальных касцюмах, спаборніцтва лесарубаў, фестываль рыбнай лоўлі, шоу барабаншчыкаў, выступленне танцавальных калектываў і шмат іншага. Будуць працаваць гастранамічная і дзіцячая пляцоўкі. На асаблівай пляцоўцы на беразе можна будзе азнаёміцца ​​з гісторыяй Аўгустоўскага канала.