ДПК: больш за 1,9 тыс. фур чакаюць уезду ў Еўрасаюз

29 ліпеня, Мінск /Кар. БЕЛТА/. Больш за 1,9 тыс. фур чакаюць уезду ў Еўрасаюз. Аб гэтым БЕЛТА паведамілі ў Дзяржпагранкамітэце.

"З пятніцы колькасць грузавых аўто, якія чакаюць уезду ў Еўрасаюз, павялічылася з 1660 да 1940 адзінак. Самы загружаны маршрут праходзіць праз пункт пропуску "Мядзінінкай" (сумежны "Каменны Лог"), тут за два дні ў Літву ўехала 13 працэнтаў транспарту ад нормы. Праз літоўскі "Шальчынінкай" (сумежны "Беняконі") на тэрыторыю ЕС уехала 48 працэнтаў велікагрузаў", - паведамілі ў пагранічным ведамстве.

Кантрольныя службы польскага пагранперахода "Кукурыкі" (сумежны "Казловічы") прынялі на сваю тэрыторыю 74 працэнты грузавога транспарту. Праз адзіны функцыянуючы латвійскі пункт пропуску "Патэрніекі" (сумежны "Грыгароўшчына") у ЕС прайшло 42 працэнты фур.

Самы загружаны маршрут у Еўрасаюз для легкавушак праходзіць цераз польскі "Цярэспаль" (сумежны "Брэст"). Праз яго ў Польшчу з пятніцы прайшло ўсяго 35 працэнтаў транспарту.

У чарзе на ўезд у Літву знаходзіцца 180 легкавушак. З пятніцы сумежны бок прыняў на сваю тэрыторыю 57 працэнтаў аўто ад нормы.

Па стане на 12.00 перад польскім "Цярэспалем" (сумежны "Брэст") і літоўскім "Мядзінінкаем" (сумежны "Каменны Лог") уезду ў ЕС чакаюць 40 і 6 аўтобусаў адпаведна.-0-