26 чэрвеня, Мінск /Кар. БЕЛТА/. Палата прадстаўнікоў прыняла сёння ў першым чытанні папраўкі ў законы па пытаннях эфектыўнага функцыянавання ваеннай арганізацыі дзяржавы. Законапраект прадугледжвае, што адтэрміноўку ад прызыву для прадаўжэння адукацыі ў Беларусі будуць прадастаўляць толькі адзін раз, перадае карэспандэнт БЕЛТА.
Законапраект у Авальнай зале прадставіў міністр абароны Андрэй Раўкоў. Ён адзначыў, што па аб'ектыўных прычынах Узброеныя Сілы адчуваюць цяжкасці з камплектаваннем асабовым складам. Звязана гэта як з дэмаграфічнай сітуацыяй, пагаршэннем здароўя юнакоў, так і з існаваннем вялікай колькасці адтэрміновак ад арміі. Па колькасці катэгорый грамадзян, якім яны прадастаўляюцца, а іх 76, Беларусь абагнала постсавецкія краіны і краіны далёкага замежжа.
"Ва ўмовах дастатковасці прызыўных рэсурсаў Міністэрства абароны заўсёды ішло насустрач прапановам зацікаўленых па прадастаўленні адтэрміноўкі тым ці іншым катэгорыям грамадзян, - сказаў міністр. - Прынятыя раней меры аб адмене адтэрміновак для завочнікаў, пераглядзе патрабаванняў да стану здароўя прызыўнікоў, замацаванні магчымасці прыёму на ваенную службу па кантракце дазволілі на некалькі гадоў стабілізаваць сітуацыю. Але гэтыя меры ўжо вычарпалі сябе".
Законапраект прадугледжвае, што адтэрміноўку ад прызыву для прадаўжэння адукацыі ў Беларусі будуць прадастаўляць толькі адзін раз. Ніхто не абмяжоўвае патэнцыяльных прызыўнікоў у праве паступаць у сярэднія спецыяльныя і вышэйшыя навучальныя ўстановы. Законапраектам прадугледжана: калі адтэрміноўкай студэнт уже скарыстаўся, то на час службы ва Узброеных Сілах яму будзе прадастаўляцца акадэмічны водпуск.
"Прынцып аднаразовасці не будзе распаўсюджвацца на тых, хто навучаецца па напрамках дзяржорганаў. Усе адтэрміноўкі, якія былі прадастаўлены да ўступлення ў сілу законапраекта, будуць дзейнічаць. Адмяняць іх ніхто не плануе", - удакладніў Андрэй Раўкоў.
Акрамя таго, праектам прадугледжана, што тых, хто ўхіліўся ад арміі, не будуць прымаць на дзяржаўную службу, а таксама ў органы ўнутраных спраў, МНС, СК, ДКСЭ і гэтак далей. Такое абмежаванне не закране тых, хто не прызываўся па стане здароўя, меў адтэрміноўку або быў вызвалены ад прызыву, а таксама тых, хто, не чакаючы прызыву, паступіў на службу па кантракце ў сілавыя структуры. У сухім астатку застаюцца прызыўнікі, якія ўхіляюцца, прымаюць усе меры, каб не атрымаць павестку. Яны прыходзяць у ваенкамат толькі тады, калі ім спаўняецца 27 гадоў, атрымліваюць ваенны білет і ідуць працаваць, куды ім хочацца. Прыблізна гэта 4 тыс. чалавек на кожны прызыў. "Мы лічым, што такія дзеянні несумяшчальныя з займаннем дзяржаўных пасад. Як яны могуць эфектыўна працаваць у інтарэсах дзяржавы, калі наўмысна не выканалі воінскі абавязак?" - задаўся пытаннем кіраўнік абароннага ведамства.
У адпаведнасці з праектам закона плануецца ўвядзенне часовага абмежавання на выезд з Беларусі для грамадзян, якія не з'яўляюцца на мерапрыемствы па прызыве на ваенную службу, службу ў рэзерве або не выконваюць абавязкі па воінскім уліку. Яны не паведамляюць у ваенкаматы звесткі аб змяненні месца жыхарства або месцы знаходжання. З-за гэтага немагчыма праінфармаваць іх у тэрмін прызыву.
Законапраект прадастаўляе права раённай (гарадской) прызыўной камісіі і ваенным камісарам прымаць рашэнне аб прызнанні грамадзян не прайшоўшымі ваенную службу па прызыве, не маючы на тое законных падстаў. У выпадку з камісіямі размова ідзе аб маладых людзях да 27 гадоў, якія не знаходзяцца ў запасе, ухіляюцца ад прызыву, службы ў рэзерве, не выконваюць свае абавязкі па воінскім уліку. Ваенныя камісары такія рашэнні будуць прымаць адносна залічаных у запас, калі яны да дасягнення 27-гадовага ўзросту ўхіляюцца ад прызыву або не выконваюць свае абавязкі па воінскім уліку.
Як растлумачылі раней дэпутаты, забарона на выезд будзе дзейнічаць, калі грамадзяніну было належным чынам паведамлена аб яўцы ў ваенны камісарыят і ён не прыбыў без уважлівых прычын. Ухілісту паведамяць, што яму забаронены выезд за мяжу. Рашэнне павінна быць уручана яму ў рукі. Пасля гэтага яго можна будзе абскардзіць на працягу тыдня. Калі маладому чалавеку споўніцца 27 гадоў, забарона будзе знята.
Аўтары законапраекта прапануюць таксама вызваляць тых, хто добраахвотна паступіў на ваенную службу па кантракце і праслужыў не менш за тэрмін абавязковай работы, ад пакрыцця ў бюджэт сродкаў, затрачаных на іх падрыхтоўку.
Прыняцце паправак дасць магчымасць павысіць узровень укамплектаванасці УС і іншых войскаў прызыўнымі рэсурсамі, будзе садзейнічаць павышэнню прэстыжу дзяржаўнай службы, службы ў сілавым блоку.-0-
