Сцяг Аўторак, 19 сакавіка 2024
Усе навіны
Усе навіны
Грамадства
29 чэрвеня 2022, 10:46

Дэпутаты прынялі ў другім чытанні законапраект па пытаннях зямельных адносін

29 чэрвеня, Мінск /Кар. БЕЛТА/. Дэпутаты на пасяджэнні восьмай сесіі Палаты прадстаўнікоў Нацыянальнага сходу сёмага склікання прынялі ў другім чытанні законапраект "Аб змяненні кодэксаў" (па пытаннях зямельных адносін і самавольнага будаўніцтва), перадае карэспандэнт БЕЛТА.

Законапраектам Кодэкс аб зямлі выкладаецца ў новай рэдакцыі. Прадугледжваецца, што вырашэнне фундаментальных пытанняў, якія датычацца выкарыстання сельскагаспадарчых і лясных зямель, захоўваецца ў паўнамоцтвах Прэзідэнта. Савет Міністраў надзяляецца кампетэнцыяй па ўстанаўленні парадкаў адабрання і прадастаўлення зямельных участкаў, пераводу зямель з адных катэгорый і відаў у іншыя. Карэкціруюцца паўнамоцтвы раённых, гарадскіх выканаўчых камітэтаў.

Уладзімір Андрэйчанка

"Сёння ў другім чытанні прыняты вельмі важны законапраект, які датычыцца кожнага чалавека, кожнага грамадзяніна, арганізацый, усіх, хто зацікаўлены працаваць на зямлі, будаваць на зямлі, развіваць сваю дзяржаву, - сказаў старшыня Пастаяннай камісіі па аграрнай палітыцы Палаты прадстаўнікоў Мікалай Шаўчук. - Унесены прынцыповыя змяненні. Згодна з новай Канстытуцыяй частка паўнамоцтваў перададзена органам на месцах, частка паўнамоцтваў перададзена ўраду. За Прэзідэнтам застаюцца стратэгічныя пытанні, якія забяспечваюць бяспеку краіны, - гэта землі сельскагаспадарчага прызначэння і лясныя землі. Астатнія пытанні, якія існуюць у грамадстве, будуць вырашацца на мясцовым узроўні згодна з існуючымі нормамі і новым заканадаўствам. Акрамя таго, можна будзе ўзаконіць усе тыя супярэчнасці, якія меліся пры будаўніцтве, самавольным будаўніцтве, нейкіх невялікіх парушэннях пры будаўніцтве. Яны будуць вырашацца на ўзроўні мясцовых органаў улады, якія прымуць рашэнне на карысць грамадзяніна. Таксама можна будзе развіваць сельскагаспадарчыя арганізацыі, бізнес, фермерства, атрымаць зямлю без асаблівых праблем. Чалавек зможа атрымаць столькі зямлі, колькі яму неабходна. Ён можа спакойна апрацоўваць участкі і атрымаць тыя землі, якія знаходзяцца побач і не апрацоўваюцца. Прадугледжваецца магчымасць павелічэння ўчасткаў, якія раней выдзяляліся для асабістай падсобнай гаспадаркі. Усе пытанні, якія ставіла жыццё, дэпутаты максімальна ўлічылі ў новым Кодэксе аб зямлі".

Для выключэння карупцыйных праяў, а таксама эфектыўнага выкарыстання "залатых" зямель прыгарадных раёнаў Мінска і абласных цэнтраў устанаўліваецца патрабаванне аб унясенні землекарыстальнікам платы за зямельны ўчастак па яго рыначным кошце, але не ніжэй за кадастравы. У выпадку, калі зямельны ўчастак быў выкуплены ў прыватную ўласнасць па кадастравым кошце, землекарыстальнікам будзе ажыццяўляцца даплата розніцы паміж рыначным і кадастравым коштам зямельнага ўчастка. Павялічваюцца памеры зямельных участкаў, якія прадстаўляюцца грамадзянам у сельскіх населеных пунктах.

Акрамя таго, праектам закона прапануецца новая рэдакцыя арт. 223 Грамадзянскага кодэкса. Так, пад самавольным будаўніцтвам прапануецца разумець дзейнасць асобы па ўзвядзенні, рэканструкцыі, мадэрнізацыі, рэстаўрацыі, капітальным рамонце, зносе аб'екта або яго часткі, калі яна ажыццёўлена: на самавольна занятым зямельным участку, на зямельным участку, які выкарыстоўваецца не па мэтавым прызначэнні, на зямельным участку, прадастаўленым дзяржаўным органам, што не мае паўнамоцтваў на прыняцце адпаведнага рашэння, або без правядзення аўкцыёну, калі прадастаўленне зямельнага ўчастка магчыма толькі па выніках аўкцыёну, або з парушэннем устаноўленай чарговасці прадастаўлення зямельных участкаў, або без папярэдняга ўзгаднення месца размяшчэння зямельнага ўчастка, калі ў адпаведнасці з заканадаўчымі актамі патрабуецца такое ўзгадненне, а таксама без атрымання дазвольнай дакументацыі на будаўніцтва або без праектнай дакументацыі ў выпадку, калі абавязковасць атрымання і распрацоўкі такой дакументацыі прадугледжана заканадаўствам, альбо з парушэннем патрабаванняў, устаноўленых дазвольнай дакументацыяй на будаўніцтва.

Пры ажыццяўленні самавольнага будаўніцтва ў названых выпадках прапануецца ўстанавіць абавязковую норму аб прыняцці мясцовымі выканаўчымі і распарадчымі органамі, калі іншае не ўстаноўлена Прэзідэнтам, рашэння аб лёсе аб'екта. У выпадку адмовы асобы выканаць прынятае рашэнне ажыццяўляецца знос аб'екта з кампенсаваннем асобай нанесенага ўрону.

Законапраектам таксама ўносяцца карэктывы ў Грамадзянскі кодэкс адносна кампетэнцыі мясцовых выканаўчых і распарадчых органаў у частцы адмовы ад права ўласнасці.

Праектам закона прапануецца ўстанавіць, што пасля ўступлення ў сілу закона на працягу 3 гадоў Мінскі гарадскі, абласныя выканаўчыя камітэты па ўзгадненні з кіраўніком дзяржавы будуць мець права прыняць рашэнне аб лёсе зямельнага ўчастка пры самавольным яго заняцці. Нормы законапраекта дадуць магчымасць значнай частцы насельніцтва рэалізаваць свае магчымасці па распараджэнні зямельнымі ўчасткамі, упарадкаваць аб'екты самавольнага будаўніцтва і ў цэлым будуць садзейнічаць развіццю сельскіх тэрыторый.-0-

Фота Віталя Піваварчыка

Падпісвайцеся на нас у
Twitter
Топ-навіны
Свежыя навіны Беларусі