17 чэрвеня, Мінск /Кар. БЕЛТА/. Дэпутаты на пасяджэнні пятай сесіі Палаты прадстаўнікоў Нацыянальнага сходу Беларусі сёмага склікання прынялі ў першым чытанні законапраект "Аб змяненні законаў па пытаннях абароны суверэнітэту і канстытуцыйнага ладу", перадае карэспандэнт БЕЛТА.
Праект закона ўнесены ў Палату прадстаўнікоў па даручэнні Прэзідэнта Саветам Міністраў 15 чэрвеня 2021 года. Дакумент распрацаваны для ўдасканалення прававога рэгулявання дзейнасцi дзяржаўных органаў, iншых арганiзацый, iх службовых асоб ва ўмовах надзвычайнага і ваеннага становішча, з улікам правапрымяняльнай практыкі, стварэння дадатковых умоў для папярэджання і нейтралізацыі рызык, выклікаў і пагроз нацыянальнай бяспецы, з улікам нарматыўных прадпісанняў дэкрэта Прэзідэнта ад 9 мая 2021 года нумар 2 "Аб абароне суверэнітэту і канстытуцыйнага ладу" і павышэння ролі Савета бяспекі ў пытаннях абароны незалежнасці, тэрытарыяльнай цэласнасці, суверэнітэту і канстытуцыйнага ладу Беларусі, падтрымання грамадзянскага міру і згоды ў краіне, процідзеяння экстрэмізму і тэрарызму.
Праектам прадугледжваецца ўнясенне змяненняў у законы "Аб Узброеных Сілах Рэспублікі Беларусь", "Аб надзвычайным становішчы" і "Аб ваенным становішчы", а таксама імплементацыя норм дэкрэта Прэзідэнта ад 9 мая 2021 года нумар 2 "Аб абароне суверэнітэту і канстытуцыйнага ладу".
Унесенымі змяненнямі ў закон "Аб Узброеных Сілах Рэспублікі Беларусь" удакладняюцца задачы Узброеных Сіл, паўнамоцтвы, сацыяльна-прававыя гарантыі ваеннаслужачых, якія прымаюць удзел у забеспячэнні рэжыму надзвычайнага і ваеннага становішча.
Законапраектам прадугледжваецца прывядзенне паняційнага апарату закона "Аб надзвычайным становішчы" ў адпаведнасць з заканадаўствам. У прыватнасці, удакладняюцца падставы і парадак увядзення і адмены надзвычайнага становішча з улікам сучасных пагроз нацыянальнай бяспецы Беларусі, скарэкціраваны надзвычайныя меры і часовыя абмежаванні, што прымяняюцца ва ўмовах надзвычайнага становішча, з улікам сучаснага заканадаўства і кампетэнцыі дзяржаўных органаў. Удакладняюцца сілы і сродкі, якія прыцягваюцца для забеспячэння рэжыму надзвычайнага становішча, а таксама парадак ажыццяўлення кантролю па рэалізацыі прымяняльных мер. Уводзіцца дадатковы дзяржаўны орган, адказны за каардынацыю дзеянняў сіл і сродкаў пры забеспячэнні рэжыму надзвычайнага становішча, а таксама яго кампетэнцыі. Вызначаецца месца і роля дзяржаўнай сістэмы рэагавання на акты тэрарызму, дзейнасць тэрарыстычных арганізацый, незаконных узброеных фарміраванняў і масавыя беспарадкі.
З улікам сучасных пагроз нацыянальнай бяспецы ў законе "Аб ваенным становішчы" дапаўняюцца падставы, умовы і парадак увядзення ваеннага становішча
Прыняцце праекта закона будзе садзейнічаць стварэнню дадатковых умоў для папярэджання і нейтралізацыі рызык, выклікаў і пагроз нацыянальнай бяспецы, павышэнню эфектыўнасці дзяржаўнай сістэмы кіравання, у тым ліку дзейнасцi дзяржаўных органаў, iншых арганiзацый, iх службовых асоб ва ўмовах надзвычайнага і ваеннага становішча, а таксама ўмацаванню тэрытарыяльнай цэласнасці, суверэнітэту і канстытуцыйнага ладу Беларусі, грамадзянскага міру і згоды ў рэспубліцы.
"Пасля ўнясення ў Палату прадстаўнікоў законапраект быў разгледжаны ва ўсіх пастаянных камісіях і ў галоўным прававым упраўленні Сакратарыята Палаты прадстаўнікоў, а таксама, як канчаткова падрыхтаваны для разгляду Палатай прадстаўнікоў у першым чытанні, накіроўваўся Прэзідэнту. Заўваг і прапаноў канцэптуальнага характару па праекце Пастаянная камісія па нацыянальнай бяспецы не атрымала. Існуючыя заўвагі і прапановы юрыдычна-тэхнічнага і рэдакцыйнага характару будуць разгледжаны пры падрыхтоўцы праекта да другога чытання і, на думку камісіі, не перашкаджаюць прыняццю законапраекта ў першым чытанні ў аўтарскай рэдакцыі", - адзначыў член Пастаяннай камісіі па нацыянальнай бяспецы Палаты прадстаўнікоў Яўген Зайцаў.-0-
Фота Аксаны Манчук