ДЗЯРЖОРГАНЫДЗЯРЖОРГАНЫ
Флаг Аўторак, 15 чэрвеня 2021
Мінск Ясна +22°C
Усе навіны
Усе навіны
Грамадства
10 чэрвеня 2021, 13:20

Дэпутаты і сенатары звярнуліся да міжнароднай супольнасці ў сувязі з сітуацыяй вакол Беларусі

10 чэрвеня, Мінск /Кар. БЕЛТА/. Дэпутаты ўсіх узроўняў і члены Савета Рэспублікі Нацыянальнага сходу прынялі зварот да міжнароднай супольнасці ў сувязі з сітуацыяй вакол Беларусі, паведамляе БЕЛТА.

"Мы, дэпутаты і члены Савета Рэспублікі Нацыянальнага сходу Рэспублікі Беларусь - паўнамоцныя прадстаўнікі беларускага народа, звяртаемся да сусветнай супольнасці з заклікам непрадузята ацаніць сітуацыю, што складваецца вакол нашай краіны, калі пад выглядам барацьбы за дэмакратычныя каштоўнасці па сутнасці маюць месца агрэсіўны ўсебаковы націск на суверэнную дзяржаву і яе грамадзян, грубае парушэнне базавых прынцыпаў міжнароднага права па неўмяшанні ва ўнутраныя справы дзяржаў. Такія дзеянні ствараюць рэальную пагрозу міжнароднаму міру і бяспецы, парушаюць агульнапрызнаныя палажэнні Статута Арганізацыі Аб'яднаных Нацый, адной з заснавальніц якой была і наша краіна, - гаворыцца ў звароце. - Незалежнасць, развіццё чалавечага патэнцыялу, эканамічны рост і ўмацаванне Беларусі з'яўляюцца як відавочнай асновай дабрабыту жыхароў нашай краіны, так і залогам геапалітычнай стабільнасці ў велізарным рэгіёне, які звязвае Еўропу, Расію і Азію".

Аўтары звароту лічаць, што замест падтрымкі і развіцця ўзаемавыгаднага супрацоўніцтва шэраг дзяржаў актыўна садзейнічае дэстабілізацыі абстаноўкі ў Рэспубліцы Беларусь - супраць нас разгорнута масіраваная інфармацыйная агрэсія, накіраваная як на ўключэнне нашых грамадзян у дэструктыўную дзейнасць з мэтай учынення дзяржаўнага перавароту, так і на фарміраванне вельмі негатыўнага вобраза краіны на міжнароднай арэне.

"Уводзяцца беспрэцэдэнтныя і неабгрунтаваныя санкцыі. Абсурднымі выглядаюць дзеянні па пазбаўленні Рэспублікі Беларусь правоў на правядзенне міжнародных спартыўных спаборніцтваў, удзел у творчых і прафесійных конкурсах, забароны на ажыццяўленне авіязносін, дыскрымінацыя кампаній і арганізацый, а ў рэшце рэшт - звычайных грамадзян нашай краіны. Беларусы вытрымаюць гэтыя выпрабаванні, таму што нам ёсць што губляць. У ХХ стагоддзі мы двойчы аднаўлялі сваю краіну - з руін Вялікай Айчыннай вайны 1941-1945 гадоў і асколкаў разбуранага ў 1991 годзе СССР. Таму не толькі моцная дзяржаўная ўлада і моцныя органы правапарадку не дазволілі ператварыць Беларусь у чарговую гарачую кропку на палітычнай карце свету, але і кожны беларус адчувае дачыненне да стварэння краіны, разумее сваю адказнасць за яе будучыню", - адзначаецца ў дакуменце.

"Сёння палітычны і эканамічны націск на нашу краіну не спыняецца, а толькі ўзмацняецца. Заяўленая мэта - садзейнічанне ўмацаванню дэмакратычных каштоўнасцей і свабод. Аднак фактычна вынік зусім іншы - падрыў эканамічнага патэнцыялу нашай краіны, запаволенне развіцця, скарачэнне сацыяльных праграм, зніжэнне дабрабыту людзей і, як вынік, - злом суверэннай беларускай дзяржаўнасці, фарміраванне зоны эканамічнай, геапалітычнай, сацыяльнай нестабільнасці ў самым цэнтры Еўропы, якая і так перажывае чараду крызісаў - міграцыйны, эканамічны, пандэмію COVID-19, - падкрэсліваюць дэпутаты і сенатары. - Мы звяртаемся да нашых замежных партнёраў з заклікам - захоўвайце прынцыпы і нормы міжнароднага права ва ўзаемаадносінах з Беларуссю, бо парушыўшы іх аднойчы, зноў надаць ім значнасць будзе складана. Мы гатовы да дыялогу, але не да прымушэння, і адказна заяўляем аб бесперспектыўнасці і недальнабачнасці любых замахаў на наша права самастойна выбудоўваць шлях развіцця Рэспублікі Беларусь".

"Мы заклікаем сусветную супольнасць выступіць супраць неабгрунтаванай, контрпрадукцыйнай і дыскрымінацыйнай палітыкі ў адносінах да Рэспублікі Беларусь, праявіць салідарнасць з нашай краінай у адстойванні права на суверэнітэт і мірнае жыццё, вярнуцца да адказнага і канструктыўнага ўзаемадзеяння на карысць усіх краін і народаў, у імя міру, бяспекі і працвітання", - рэзюмуецца ў дакуменце.

Як адзначыла старшыня Савета Рэспублікі Наталля Качанава, тыя, хто выступае за ўвядзенне санкцый, а гэтыя людзі ў асноўным жывуць за межамі нашай краіны, выступаюць супраць народа, супраць асноў нашай дзяржавы, у цэнтры ўвагі якой - чалавек.

"Дэпутатаў усіх узроўняў, прадстаўнікоў народа ў нас больш за 18 тыс. чалавек. Мы шмат сустракаемся з людзьмі і адчуваем, што людзі абураны несправядлівасцю ў адносінах да Беларусі. Паколькі асноўная мэта дзяржаўнай палітыкі - рост дабрабыту людзей, а заклікамі да санкцый перасякаецца гэта чырвоная мяжа. У Беларусі робіцца ўсё, каб захаваць мір, стабільнасць і спакой у краіне. Але знаходзяцца тыя, хто спрабуе знішчыць працоўныя калектывы, прадпрыемствы, аслабіць эканоміку ў мэтах, як яны самі кажуць, "справакаваць галодныя бунты", а ў выніку - пазбавіць краіну дзяржаўнасці і суверэнітэту. Нас гэта не проста непакоіць, а абурае! Менавіта таму мы ўсе разам звярнуліся да сусветнай супольнасці, мы хочам спынення знешняга націску на Беларусь!" - заявіла Наталля Качанава.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі