11 мая, Мінск /Кар. БЕЛТА/. Дэкрэт "Аб дадатковых мерах па барацьбе з карупцыяй" адыграе сур'ёзную прэвентыўную ролю, заявіў журналістам першы намеснік міністра юстыцыі Сяргей Задзіран, перадае карэспандэнт БЕЛТА.
"Беларуская дзяржава шукае самыя эфектыўныя меры, каб такую з'яву, як карупцыя, звесці да мінімуму. Злачынствы карупцыйнай накіраванасці, безумоўна, вельмі негатыўна ўплываюць на ўсе сферы", - сказаў Сяргей Задзіран. У прыватнасці, зніжаецца эфектыўнасць работы дзяржаўнага апарату, а гэта ў сваю чаргу аказвае ўплыў на інвестыцыйную прывабнасць краіны: інвестары адсочваюць сітуацыю па розных рэйтынгах і сур'ёзна задумваюцца, ці інвесціраваць у краіну. У рэшце рэшт гэта дае сур'ёзны негатыўны эфект для эканомікі.
Прыняты дэкрэт - чарговы крок у барацьбе з карупцыяй. Ён прадугледжвае немагчымасць прадстаўлення асоб, якія асуджаны за карупцыйныя злачынствы, да ўмоўна-датэрміновага вызвалення і замены неадбытай часткі пакарання больш мяккім. "У чалавека, які яшчэ не ўчыніў злачынства, але мае нейкія злачынныя намеры, з'яўляецца дадатковы, вельмі сур'ёзны псіхалагічны стымул для роздуму, ці варта пераступаць мяжу закону", - адзначыў Сяргей Задзіран. У дэкрэце названы дзесяць канкрэтных артыкулаў Крымінальнага кодэкса, якія ў адпаведнасці з ім будуць разглядацца ў якасці карупцыйных злачынстваў.
Распрацоўкай дакумента больш як паўгода займалася Міністэрства юстыцыі па даручэнні Прэзідэнта Беларусі Аляксандра Лукашэнкі. Праект прайшоў усе працэдуры абмеркавання і ўзгаднення, быў падтрыманы ўсімі зацікаўленымі органамі. Нарматыўны прававы акт уступае ў сілу пасля яго афіцыйнага апублікавання. Пры гэтым ураду дадзена даручэнне ў трохмесячны тэрмін забяспечыць распрацоўку законапраекта, які скарэкціруе ў адпаведнай частцы Крымінальны кодэкс.
Беларускае заканадаўства ў цэлым накіравана на выключэнне магчымасці для з'яўлення карупцыйных адносін. Як адзначыў першы намеснік міністра, вельмі важна забяспечыць празрыстасць працэсу ўзаемадзеяння паміж асобамі, якія прымаюць тыя ці іншыя рашэнні, і суб'ектамі, на якіх гэтыя рашэнні распаўсюджваюцца.
Ідзе пастаяннае ўдасканаленне заканадаўства аб дзяржаўных закупках, аб ліцэнзаванні. Сістэмна пераглядаюцца і ўдасканальваюцца падыходы да заканадаўства аб адміністрацыйных працэдурах як у адносінах да грамадзян, так і юрыдычных асоб. "Гэта неад'емныя элементы стварэння антыкарупцыйнага заканадаўства, бо чым больш празрыстым будзе механізм прыняцця рашэнняў, тым менш магчымасцей для ўзнікнення якіх-небудзь карупцыйных адносін, - упэўнены Сяргей Задзіран. - Вельмі важна забяспечыць такое заканадаўства, якое пазбаўляла б службовых асоб магчымасці яго адвольнага разумення. Чалавек, які з'яўляецца службовай асобай, павінен прымаць усе рашэнні ў адпаведнасці з дакладным адміністрацыйным рэгламентам".
У кожным дзяржаўным органе і арганізацыі створаны камісіі па барацьбе з карупцыяй. З 2018 года значна павышана іх адкрытасць: планы работы, парадак дня абавязкова загадзя размяшчаюцца на сайтах дзяржаўных органаў. Зацікаўленыя могуць прыняць удзел у пасяджэннях гэтых камісій.-0-
