16 верасня, Мінск /Кар. БЕЛТА/. Спажыўцы Мінска цалкам гатовы да будучай зімы і ацяпляльнага сезона. Аб гэтым карэспандэнту БЕЛТА расказаў намеснік старшыні Мінгарвыканкама Аляксандр Дараховіч.
"Пашпарты гатоўнасці спажыўцы і цеплакрыніцы павінны былі атрымаць да 1 верасня. Такое рашэнне Мінгарвыканкама было прынята зыходзячы з практыкі апошніх гадоў, калі ацяпляльны сезон у сталіцы стартаваў рана, часам нават у верасні. На сённяшні дзень 100 працэнтаў спажыўцоў атрымалі пашпарты гатоўнасці, падрыхтоўчыя работы выканалі таксама практычна ўсе цеплакрыніцы", - расказаў Аляксандр Дараховіч.
Ён адзначыў, што сталічныя ўлады сочаць за сітуацыяй і доўгатэрміновым прагнозам надвор'я. З надыходам халадоў спажыўцам падключаць ацяпленне ў трохдзённы тэрмін.
Рашэнні аб тэрмінах пачатку і завяршэння ацяпляльнага сезона прымаюцца на падставе даных аб сярэдняй за суткі тэмпературы паветра. У першую чаргу да ацяплення падключаюць сацыяльныя аб'екты: дзіцячыя, школьныя і дашкольныя ўстановы, бальніцы. Патрабаванне для гэтага - тэмпература мінус 8 градусаў і ніжэй на працягу пяці сутак.-0-
