22 студзеня, Мінск /Кар. БЕЛТА/. У сталіцы неабходна адладзіць інфармаванне насельніцтва аб аварыях, надзвычайных сітуацыях і іншых няштатных сітуацыях, якія адбываюцца ў сферы ЖКГ. Аб гэтым заявіў сёння намеснік старшыні Мінгарвыканкама Аляксандр Дараховіч на пасяджэнні рабочай групы па пытанні ўтрымання і добраўпарадкавання тэрыторыі Мінска, перадае карэспандэнт БЕЛТА.
Гэтай зімой амаль кожны тыдзень у Мінску здараюцца няштатныя сітуацыі. Для мегаполіса, як любога складанага жывога арганізма, гэта нармальна, падкрэсліў Аляксандр Дараховіч. І практыка паказвае, што за апошнія пяць гадоў удалося паступова мінімізаваць іх узнікненне. Але з гэтых сітуацый трэба атрымліваць урокі.
"Што мы бачым? Першае - няма інфармавання. Калі "Мінскводаканал" у мінулым годзе першым пачаў даваць інфармацыю аб няштатных сітуацыях, стаўленне да гэтага ў насельніцтва і СМІ стала зусім іншым. Таму трэба адладзіць работу па інфармаванні. Імгненна на сайце, у сваіх Telegram-каналах даваць папярэднюю інфармацыю аб тым, што і дзе адбылося", - сказаў намеснік старшыні гарвыканкама.
Па-другое, неабходна па кожнай сітуацыі правесці работу над памылкамі, каб наступны раз быць гатовымі да такіх выпадкаў і ўмець іх апярэджваць, аператыўна ўстараняць наступствы.
Наконт канкрэтна парываў у цепласетках, якія здарыліся ў апошнія дні ў Партызанскім, а напярэдадні - Маскоўскім раёнах, Аляксандр Дараховіч асноўнай прычынай назваў рэзкі перапад тэмператур (з мінусавой да нуля градусаў і больш). У прамерзлай зямлі сеткі не вытрымалі.
"Прашу занесці ў пратакол пасяджэння: пераправерыць усе слабыя месцы. Гэта датычыцца не толькі нашых вялікіх арганізацый, але і ЖЭУ", - сказаў на заканчэнне намеснік старшыні.-0-
