29 сакавіка, Мінск /Кар. БЕЛТА/. Праект "Дублёр" - перадавы вопыт у рабоце з перспектыўным кадравым рэзервам. Аб гэтым журналістам 29 сакавіка заявіў рэктар Акадэміі кіравання пры Прэзідэнце Вячаслаў Даніловіч, перадае карэспандэнт БЕЛТА.
Унікальны кіраўніцкі праект "Дублёр" рэалізуецца ўжо другі год у рамках пагаднення аб супрацоўніцтве Акадэміі кіравання і адміністрацыі Кастрычніцкага раёна Мінска. Удзельнікам праекта - лепшым студэнтам ВНУ - прадастаўляецца магчымасць выступіць дублёрамі кіраўнікоў структурных падраздзяленняў раённай адміністрацыі.
"Гэта перадавы вопыт у рабоце з перспектыўным кадравым рэзервам. Праект унікальны тым, што дае магчымасць ажыццявіць сплаў тэарэтычных і практычных ведаў студэнтаў. Мы шмат гаворым аб тым, што ў сістэме адукацыі павінен быць практычны падыход. Тут якраз самыя таленавітыя юнакі і дзяўчаты, якія праявілі свае лідарскія якасці, пэўныя ўменні і навыкі, маюць магчымасць на працягу тыдня стажыравацца на базе адміністрацыі Кастрычніцкага раёна Мінска. Вынік гэтай стажыроўкі - выкананне на працягу аднаго дня абавязкаў або намесніка кіраўніка адміністрацыі, або начальніка аднаго з упраўленняў. Я глыбока перакананы, што вопыт такой работы з перспектыўным кадравым рэзервам павінен пашырацца і па іншых дзяржаўных органах кіравання", - сказаў Вячаслаў Даніловіч.
Намеснік кіраўніка адміністрацыі Кастрычніцкага раёна Сяргей Сборцаў адзначыў, што праект "Дублёр" вельмі важны і цікавы не толькі студэнтам Акадэміі кіравання. "Тэарэтычная адукацыя - гэта заўсёды добра, ты ведаеш, як яно павінна быць, а практыка - гэта заўсёды тое, што ёсць на самай справе. Добра, калі тэорыя і практыка сябруюць. Студэнты Акадэміі кіравання пры Прэзідэнце не проста атрымліваюць практычныя навыкі, яны бачаць сам механізм рэалізацыі практычных рашэнняў. Мы спадзяёмся, што гэты праект дасць нам у тым ліку і кадравы патэнцыял. Лепшым удзельнікам праекта мы прапануем першае рабочае месца", - дадаў ён.
Настасся Жыгілевіч - студэнтка 2-га курса спецыяльнасці "дзяржаўнае кіраванне і эканоміка". Яна ўдзельнічае ў праекце ўжо другі год і дзякуючы яму пераканалася, што зрабіла правільны выбар будучай прафесіі. "Я вучуся ў Акадэміі кіравання, дзяржаўная служба - мой выбар, які зрабіла яшчэ ў 11-м класе. Праект "Дублёр" даў унікальную магчымасць зразумець, што такое дзяржаўная служба, акунуцца ў няпростае жыццё дзяржаўнага служачага і паспрабаваць яе на сабе, адчуць", - падзялілася студэнтка.
Акцэнт у праекце зроблены ў першую чаргу на выпрацоўцы ў маладых лідараў навыкаў прыняцця кіраўніцкіх рашэнняў на практыцы. У лік дублёраў былі адабраны студэнты, уключаныя ў перспектыўны кадравы рэзерв Мінскага гарадскога выканаўчага камітэта.-0-
