1 снежня, Мінск /Кар. БЕЛТА/. Чатырохсерыйны дакументальны праект "Памяць і слава" падрыхтаваны да 100-годдзя БДУ. Аб гэтым БЕЛТА паведамілі ў прэс-службе ВНУ.
Праект раскажа аб вучоных і педагогах БДУ. Асноўны акцэнт будзе зроблены на месцах іх спачыну. Гэта абумоўлена важнасцю захавання памяці, вяртання забытых імёнаў і перадачы аб іх інфармацыі будучым пакаленням.
"З'яўленню фільма папярэднічала маштабная работа па пошуку і добраўпарадкаванні надмагільных помнікаў прафесарска-выкладчыцкага складу і дзеячаў навукі БДУ. На працягу года валанцёры гістарычнага факультэта вызначалі месцы іх пахаванняў на Ваенных, Маскоўскіх і Кальварыйскіх могілках Мінска. Кожнаму некропалю прысвечана адна з 20-мінутных серый. У чацвёртым выпуску запланаваны паказ мемарыяльных дошак, устаноўленых у месцах пражывання і работы вядомых вучоных універсітэта", - расказалі ў прэс-службе.
На гэты момант даступна трансляцыя першай серыі "Ваенныя могілкі". Вядучы праекта чацвёртакурснік Юрый Тамковіч знаёміць з 15 біяграфіямі прадстаўнікоў навукі, мастацтва, палітыкі, якія працавалі ў розныя гады ў БДУ. Сярод іх гісторык і адзін з заснавальнікаў БДУ Усевалад Ігнатоўскі, рэктар у 1938-1946 гадах Парфён Савіцкі, эканаміст Абрам Лур'е, пісьменнік Якуб Колас, мастак Якаў Кругер, юрыст Міхаіл Грэдзінгер, батанік-альголаг Мікалай Гайдукоў, гісторык Іосіф Юхо. Гледачы ўбачаць унікальныя архіўныя дакументы і фатаграфіі. Сярод іх пасведчанне Усевалада Ігнатоўскага, прафсаюзны білет Абрама Лур'е, пісьмо студэнта Мікалая Раманоўскага (Кузьмы Чорнага).
Выпускі дакументальнага фільма будуць размешчаны на афіцыйным канале гістарычнага факультэта ў YouTube.
Ініцыятыва і рэалізацыя ідэі па стварэнні фільма належыць студэнтам і выкладчыкам гістарычнага факультэта БДУ.-0-
