6 снежня, Мінск /Кар. БЕЛТА/. У сувязі з выпадзеннем снегу сталічная Дзяржаўтаінспекцыя заклікае ўдзельнікаў дарожнага руху праяўляць максімум асцярожнасці і разважлівасці на дарогах. Аб гэтым БЕЛТА паведамілі ва УДАІ ГУУС Мінгарвыканкама.
"Снег на праезнай частцы значна змяншае счапленне колаў з дарожным пакрыццём, а тармазны шлях пры гэтым павялічваецца. Пры паездках у час снегападу трэба трымаць дыстанцыю і выбіраць бяспечную скорасць руху. Не выконвайце без патрэбы такія манеўры, як перастраенне або абгон. Тармазіць трэба плаўна і загадзя, таму што рэзкі рух руля можа імгненна развярнуць аўтамабіль упоперак дарогі. Абавязкова прышпільвайцеся рамянём бяспекі, - расказалі ў ДАІ. - Пешаходам трэба быць асабліва ўважлівымі пры пераходзе праезнай часткі. Памятайце, што ваша законная тэрыторыя - пешаходны пераход. Глядзіце па баках, не рабіце рэзкіх рухаў, будзьце прадказальнымі. У непагадзь неабходна быць прыкметным на дарозе. Таму на адзенні трэба мець святлоадбівальныя элементы".
У сваю чаргу, экіпажы ДАІ арыентаваны на аказанне дапамогі грамадзянам, якія апынуліся ў складанай сітуацыі на дарозе. У выпадку ўзнікнення няштатнай сітуацыі званіце па нумары 102.-0-
