26 сакавіка, Мінск /Кар. БЕЛТА/. Дзяржаўтаінспекцыя правядзе рэспубліканскую прафілактычную акцыю "Будзь прыкладам для свайго дзіцяці" з 27 сакавіка па 5 красавіка, паведамілі БЕЛТА ва УДАІ МУС Беларусі.
"Аналіз аварыйнасці папярэдніх гадоў паказвае, што ў канцы сакавіка - красавіку адбываецца рэзкае павелічэнне ДТЗ з удзелам дзяцей. Калі цяплее, дзеці шмат часу праводзяць на вуліцы, а занятыя дарослыя не заўсёды з належнай увагай ставяцца да гэтага. Таксама ў час пачатку і заканчэння канікул найбольш востра стаіць праблема бяспечнай перавозкі дзяцей да месцаў адпачынку і назад, - адзначылі ў ДАІ. - Для пярэджання дарожна-транспартных здарэнняў з удзелам непаўналетніх з 27 сакавіка па 5 красавіка Дзяржаўтаінспекцыя правядзе рэспубліканскую прафілактычную акцыю "Будзь прыкладам для свайго дзіцяці!".
Інспектары ДАІ засяродзяць увагу на інфармацыйна-растлумачальнай рабоце з дарослымі. "Міліцыянеры наведаюць працоўныя калектывы, нагадаюць пра пагрозы бяспецы дзяцей на дарозе, прычыны і наступствы ДТЗ з удзелам непаўналетніх. Будуць абмяркоўвацца правілы бяспечнай перавозкі маленькіх пасажыраў, адказнасць за парушэнні ПДР, а таксама неабходнасць асабістага прыкладу правільных і бяспечных паводзін на дарозе", - расказалі ў ДАІ.
Таксама інспектары пракантралююць выкананне вадзіцелямі скораснага рэжыму, правіл праезду пешаходных пераходаў і бяспечнай перавозкі дзяцей. Акрамя таго, у сувязі з павелічэннем колькасці арганізаваных экскурсій вядзецца нагляд за выкананнем правіл вадзіцелямі аўтобусаў з групамі дзяцей. А вуліцы, дарогі і тэхсродкі арганізацыі руху паблізу ўстаноў з масавым знаходжаннем дзяцей абследуюць на наяўнасць недахопаў.
У прышкольных лагерах інспектары ДАІ нагадаюць дзецям правілы бяспечных паводзін на дарозе, у тым ліку на нерэгулюемых пешаходных пераходах, пры выкарыстанні веласіпедаў і іншых сродкаў перамяшчэння. Закрануць тэму мабільных тэлефонаў, навушнікаў і іншых рэчаў, якія могуць адцягнуць увагу дзяцей.
З пачатку бягучага года на дарогах краіны загінулі 3 дзіцяці, яшчэ 50 непаўналетніх атрымалі траўмы. Як адзначылі ў ДАІ, 80 працэнтаў ДТЗ з удзелам дзяцей учыняюцца па віне дарослых.-0-
