21 сакавіка, Мінск /Кар. БЕЛТА/. Мастацкая творчасць і жыццё - узаемазалежныя паняцці, заявіў мастацтвазнавец, тэлевядучы, грамадскі, дзяржаўны і культурны дзеяч, спецыяльны прадстаўнік прэзідэнта Расійскай Федэрацыі па міжнародным культурным супрацоўніцтве Міхаіл Швыдкой на Міжнародным сімпозіуме літаратараў "Пісьменнік і час. Някніжны свет", што праходзіць у Беларускім дзяржаўным універсітэце, перадае карэспандэнт БЕЛТА.
"Як пісьменнікі, мастакі адлюстроўваюць час? Гэта вельмі складанае пытанне. Некаторым здаецца, што можна, як сказаў паэт, да штыка прыраўнаваць пяро. Але пяро і штык не заўсёды супадаюць як інструменты ўздзеяння на людзей. Штык - зброя прамога дзеяння, а літаратура - гэта вельмі складаная сфера ўплыву на чалавечую душу", - сказаў Міхаіл Швыдкой.
Паводле яго слоў, вельмі часта на літаратуру перакладаюць адказнасць, якую яна на самай справе вынесці не можа. "Часам здаецца, што толькі літаратура мяняе жыццё. Так, літаратура таксама мяняе жыццё. Мы можам, вядома, уплываць на змяненне жыцця з дапамогай мастацкай творчасці. Але трэба разумець, што і мастацкая творчасць залежыць ад таго, якім жыццём мы жывём. Гэта ўзаемазвязана", - падкрэсліў мастацтвазнавец.
Разам з тым ён упэўнены ў тым, што слова здольна ўберагчы ад жахаў жыцця. Цяпер (зрэшты, як і заўсёды) на пісьменніках ляжыць вельмі вялікая адказнасць. "Можна множыць вар'яцтва жыцця, хаос жыцця, а можна яго ўпарадкаваць. Уласна, мастацкая творчасць - гэта спроба гарманізаваць рэчаіснасць, што з'яўляецца вышэйшай місіяй і цяжкай ношай, вельмі часта няўдзячнай", - адзначыў Міхаіл Швыдкой.-0-
