26 кастрычніка, Мінск /Кар. БЕЛТА/. Да 17 градусаў цяпла будзе ў Беларусі на гэтым тыдні, паведамілі БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
Паводле інфармацыі сіноптыкаў, у бліжэйшыя дні асноўную ролю ў фарміраванні метэаралагічных умоў прадоўжыць адыгрываць заходняя ўскраіна антыцыклону з цэнтрам над Сярэдняй Волгай. У такой сітуацыі тэмпературныя паказчыкі будуць вышэйшымі за кліматычную норму, а верагоднасць ападкаў застанецца невялікай.
У аўторак, 27 кастрычніка, чакаецца воблачна з праясненнямі. Пераважна без ападкаў. Ноччу і раніцай у асобных раёнах будзе слабы туман. Вецер паўднёвы, паўднёва-ўсходні 4-9 м/с, днём парывы да 14 м/с. Тэмпература паветра ноччу складзе 4-10 градусаў цяпла, днём - 11-17 вышэй за нуль.
У сераду, 28 кастрычніка, сітуацыя ў атмасферы не зменіцца. Па-ранейшаму Беларусь будзе знаходзіцца на заходняй перыферыі антыцыклону з цэнтрам над Сярэдняй Волгай. Чакаецца воблачна з праясненнямі, пераважна без ападкаў, толькі ў асобных раёнах па паўночным захадзе магчымы невялікія кароткачасовыя дажджы. Ноччу і раніцай месцамі па краіне могуць згушчацца туманы. Вецер паўднёвай чвэрці ўмераны. Тэмпература паветра ноччу - ад 3 да 10 градусаў са знакам плюс, днём - 10-17 градусаў цяпла.
У чацвер, 29 кастрычніка, атмасферны ціск пачне падаць, і з Заходняй Еўропы да тэрыторыі краіны падыдуць малаактыўныя франтальныя раздзелы. У асобных раёнах пройдуць невялікія кароткачасовыя дажджы. Ноччу і раніцай месцамі туман. Вецер паўднёвай чвэрці ўмераны. Ноччу чакаецца 3-9 градусаў цяпла, днём - плюс 10-16.
Істотна не зменіцца характар надвор'я ў апошніх чыслах кастрычніка і ў першы дзень лістапада, толькі з-за вялікай колькасці шчыльных аблокаў у дзённыя гадзіны будзе халадней. Тэмпература паветра ноччу складзе 4-9 градусаў цяпла, днём - 7-12 вышэй за нуль. Месцамі па краіне пройдуць кароткачасовыя дажджы. Ноччу і раніцай у асобных раёнах могуць згушчацца слабыя туманы.
Паводле папярэдняга аналізу, кастрычнік 2020 года будзе на 3-4 градусы цяплейшы, чым звычайна, а дажджоў выпадала дастаткова, месцамі нават у 1,5-2 разы ападкі перавысілі кліматычную кастрычніцкую норму.-0-
