27 студзеня, Мінск /Кар. БЕЛТА/. З кожным годам запыт моладзі на творчую работу і праектную дзейнасць павялічваецца, заявіла журналістам начальнік галоўнага ўпраўлення ідэалагічнай работы і па справах моладзі Мінгарвыканкама Вольга Чамаданава, перадае карэспандэнт БЕЛТА.
"У горадзе Мінску пражывае больш за 404 тыс. моладзі ва ўзросце ад 14 гадоў да 31 года. З гэтай колькасці больш за 90 тыс. - гэта студэнты вышэйшых навучальных устаноў, а таксама 38 тыс. - гэта навучэнцы прафесійных каледжаў, ліцэяў. На тэрыторыі Мінска ўжо ў 58 арганізацыях працуюць спецыялісты па рабоце з моладдзю. 19 спецыялістаў па рабоце з моладдзю вызначаны выключна ў 2022 годзе", - расказала Вольга Чамаданава.
Паводле яе слоў, з кожным годам запыт моладзі на творчую работу і праектную дзейнасць павялічваецца. "І мы разумеем, што праекта "Мінская змена", які ўжо другі год рэалізуецца на тэрыторыі горада, на сённяшні дзень, вядома ж, недастаткова. Мы ўнеслі прапанову аб пашырэнні праектнай дзейнасці як адміністрацыямі раёнаў, так і арганізацыямі і вышэйшымі навучальнымі ўстановамі, якія размешчаны на тэрыторыі сталіцы. Сёння на тэрыторыі Мінска створаны маладзёжныя саветы ў адміністрацыях раёнаў горада, а таксама пры Мінскім гарадскім Савеце дэпутатаў. Але работа маладзёжнага савета сёння павінна быць перагледжана ў практычнай плоскасці. Гэта маладыя людзі, якія павінны стаць рупарам, яны павінны прыходзіць у калектывы, выступаць, у тым ліку і каардынаваць работу з моладдзю на прадпрыемствах, ва ўстановах адукацыі", - адзначыла начальнік упраўлення.
Перспектыўны кадравы рэзерв, які сёння створаны як у адміністрацыях раёнаў, так і ў гарвыканкаме, павінен быць больш шматлікім, падкрэсліла Вольга Чамаданава. "Паколькі сярод моладзі шмат амбіцыйных людзей, якія могуць быць кіраўнікамі", - дадала яна.
Напярэдадні адбылося пасяджэнне Мінгарвыканкама. Асноўнае пытанне парадку дня - аб рэалізацыі дзяржаўнай маладзёжнай палітыкі ў Мінску.-0-
